– Eg liker menneske. Eg liker å jobbe med menneske, liker å snakke med menneske. Så kvifor ikkje prøve?, seier Ole Martin Thoresen.
29-åringen har ikkje sete på skolebenken sidan han var 16–17 år gammal. Nå fortel han ivrig at han vil ta fagbrev som helsefagarbeidar. På halvparten av normal tid.
- Har du høyrt om elevane som må køyre bil mellom klasseromma? Når dei kjem fram, er klasserommet i gangen
– På ein sjukeheim og ein omsorgsheim kan eg prate meir personleg med folk.
Menn fell ofte utanfor
Nyleg hadde Thoresen sin første dag som helserekrutt på Glemmen vidaregåande skole i Fredrikstad. Dei blir kalla «helserekruttar», deltakarane på prosjektet «Menn i helse».
Prosjektet er eit ekspressløp for menn i alderen 25 til 55.
Deltakarane er ofte menn som har falle litt utanfor i arbeidslivet, og som er registrerte hos Nav. Mange har dårlege erfaringar frå skolen.
Målet deira er å ta fagbrev som helsefagarbeidar på to år. Den vanlege vegen til fagbrev er å gå to år på skole og to år i bedrift.
Tidlegare elevar fortel om erfaringane sine til dei nye.
Foto: Odd Skjerdal / NRKThoresen meiner helsefaget harmonerer meir med korleis han er som person. Tidlegare jobba han på eit lager, men fann seg ikkje heilt til rette. Samtalane der var stort sett fagprat med kundar.
– Eg er meir interessert i å høyre historia di enn om kva du skal pusse opp med.
I dag finst «Menn i helse» i 150 kommunar i 13 fylke i landet. Så langt har 1100 deltakarar fullført fagbrevet på halve tida. Heile 9 av 10 har fått relevant jobb.
Stort behov for helsefagarbeidarar
Fylkeskoordinator for Østfold, Lise Thoresen, seier at det har sine fordelar å undervise vaksne.
Fylkeskoordinator Lise Thoresen seier at studieløpet er spesialtilpassa vaksne, erfarne menneske.
Foto: Odd Skjerdal / NRK– Dei kjem inn med mykje erfaring, både frå arbeidslivet og frå livet generelt. Dei er vaksne og har mykje grunnkompetanse som bidrar til at dei lettare kjem seg gjennom løpet.
Det er liten tvil om at helsesektoren har, og kjem til å ha, stort behov for personell i uoverskodeleg framtid.
Underskotet på helsefagarbeidarar kan komme opp i over 24.000 årsverk i 2024, Statistisk sentralbyrå (SSB).
Ikkje nokon kvileheim
Rekruttane har vore borte frå skolen i fleire år. Lærar Brit Nina Sjøberg Solli seier at dei prøver å ha mest mogleg praksis, men at elevane må ha teorien på plass uansett.
Lærer Brit Nina Solli meiner at det er viktig å ha gode studierutinar.
Foto: Odd Skjerdal / NRK– Det er mykje teori som skal inn. Du er ikkje ferdig når du går heim frå skolen. Du må jobbe på kveldane, og du bør lage deg ein plan på korleis du skal jobbe, seier ho.
Ole Martin fortel at han ikkje var flink på skolen og at han har konsentrasjonsvanskar. Likevel trur han at dette kjem til å gå bra.
– Sjølv om pensumet skal takast på halve tida, trur eg det skal gå. Eg kjenner at det kjem til å gå. For meg er det fint at vi har 3–4 veker skole og 3–4 veker praksis. Ikkje berre tar du teorien med ut i praksis. Du tar også det du lærer i praksis tilbake til skolen igjen.
– Har ein lyst til å få det til, så går det, meiner han
- I desember fekk alle rektorar i Fredrikstad nok og gjekk ut med eit varsel om forholda i grunnskolen.