– Ei gåve i julegryta blir til mat, klede, omsorg og fellesskap, seier major i Frelsesarmeen i Moss Bjørn Løvdahl.
I desember set Frelsesarmeen ut julegryter som forbipasserande kan velja å donera pengar til.
I år har dei plassert ut over 250 gryter over heile landet. Det som kjem inn i julegrytene går direkte til lokale tiltak.
– Det legg grunnlaget for kva me kan bidra med av hjelp i 2024. For vår del gjeld det Moss, Våler og Råde, seier Løvdahl.
I staden for å leggja kontantar i dei tradisjonelle julegrytene kan folk som går forbi på Amfisenteret i Moss velja å vipsa eit beløp.
Foto: Julie Helene Günther / NRKHan fortel at både enkeltpersonar og bedrifter er flinke til å gi.
– Det betyr mykje. Matkøane veks og stadig fleire ber om hjelp fordi økonomien ikkje strekk til, seier Løvdahl.
Fryktar nok eit rekordår
På denne tida i fjor auka matkøane i Moss så kraftig at dei var blant dei lengste i Noreg.
Frelsesarmeen håpa det skulle bli betre i år, men førebels ser det ikkje lovande ut.
Saman med Kirkens Bymisjon hjelper dei no over 700 husstandar i Moss, Våler og Råde med mathjelp. I juni i fjor var talet 400.
– Behovet for hjelp aukar og aukar, seier Løvdahl.
Trenden er den same fleire stader i landet. 69 prosent av mathjelparar svarer at det er fleire som hentar mat no, samanlikna med før pandemien.
Det kjem fram i ei undersøking frå Fafo og Institutt for samfunnsforsking.
Av dei åtte kommunane dei undersøkte er det størst auke av personar som treng hjelp i Moss.
Stor pågang
– Eg lurer på korleis dette skal enda. Hadde det ikkje vore for oss frivillige som hjelper dei som treng det så hadde det ikkje gått rundt, seier frivillig i organisasjonen Hjelp oss å hjelpa Liza Thorvaldsen.
Fleire stader i Østfold har organisasjonen Hjelp oss å hjelpa plassert ut slike juletre. Under treet kan dei som ønskjer det leggja julegåver.
Foto: Liza ThorvaldsenHo er bekymra for pågangen.
– Førespurnadene om hjelp går opp. Samtidig som me får mindre inn, seier Thorvaldsen.
Organisasjonen merkar at færre donerer no enn dei gjorde før.
– Fleire får ikkje kvardagen til å gå rundt sånn som før, seier ho.