– Dette kunne skjedd kven som helst, mange kan nok fort gløyme at det finst fleire giftige plantar i Noreg, seier mora.
Ho og venninna tok med barna sine på maisplukking på ein gard i Moss på søndag. Men det heile tok plutseleg ei brå vending.
Før ho visste ordet av det, oppdaga ho at sonen åt det som likna på blåbær.
– Eg hadde gitt klar beskjed om at bæret ikkje kunne etast til den eldste sonen min som hadde funne eitt i forkant. Eg følgde også nøye med på minstemann, men i det minuttet eg snudde meg hadde han klart å få tak i fleire bær.
Etter eit raskt Google-søk fann ho ut at bæret likna på Belladonnaurt – ein svært giftig plante.
Det var Moss Avis som først omtalte saka.
Vart henta med ambulanse
Mora kontakta raskt giftsentralen og sende bilde. Ho vart deretter bedt om å ringe 113 fordi giftinformasjonen ikkje var sikre på kva plante det gjaldt.
Kort tid etter vart dei henta av ambulanse.
– Det vart slått full alarm på sjukehuset. Han min fekk raskt medisinsk kull. Det var heilt forferdeleg og det gjorde vondt i mammahjartet. Eg visste ikkje kor mange bær han hadde fått i seg, og han hadde låg pustefrekvens.
1-åringen var innlagd på sjukehuset frå søndag til måndag ettermiddag. I ettertid viste det seg at sonen hadde fått i seg bær frå planten Svartsøtvier – ein plante som er mindre giftig.
– Svartsøtvier er ikkje ein plante giftinformasjon får så mykje spørsmål om. Det er nok fordi han ikkje er så vanleg i Noreg. Men han liknar på Belladonnaurt som er svært farleg, seier seniorrådgivar Mette Ekeland i Giftinformasjonen (FHI).
Får førespurnader dagleg
Kvar dag får Giftinformasjonen førespurnader frå bekymra foreldre med barn som har ete bær eller sopp som ser freistande ut. Dei mest ivrige er barn under fire år.
Dei fleste plantane i Noreg er ufarlege å smake på. Men det finst både bær og plantar som kan føre til alvorleg forgifting. Heldigvis skjer dette sjeldan.
Dersom uhellet skulle oppstå ber Giftinformasjonen om at foreldre i første omgang prøver å finne ut kva plante det gjeld.
– Det er ikkje alltid ein veit kva plante det er snakk om, då prøver vi i alle fall å luke ut dei giftigaste plantane. I ein del tilfelle kan vi leggje ballen død utan at det blir for mykje styr, seier Ekeland.
– I nokre tilfelle kan giftige bær og planter smake vondt og barn spyttar dei ut, men det er ingen universell regel, legg ho til.
Mora til 1-åringen fortel at sonen har det fint no. Ho ønskjer likevel å åtvare andre foreldre.
– Det gjekk heldigvis bra, men det var ein tankevekkjar. Det er fort gjort å bli naiv og tenkje at det ordnar seg. Eg er ikkje uoppmerksam, men eg trur dette kan skje alle.
NRK har vore i kontakt med eigarane av maisgarden i Moss. Dei var ikkje klar over at det fanst giftig ugras i åkeren, og seier at det er svært beklageleg. Dei skal no gjere det dei kan for å unngå at noko liknande skjer igjen.