– Det kjem nok ein god del nedbør utover veka, i samband med austleg og nordaustleg vind. Om det kjem som sludd eller snø er kjem an på temperaturane, seier statsmeteorolog Kristen Gislefoss.
Prognosane lovar noko meir vinterleg ver utover i veka. Men om snøen held seg, er meir usikkert.
– Temperaturane kjem til å ligge rundt null-streken, så det kan nok skifte raskt, seier Gislefoss.
Og temperaturane er lågare no enn dei har vore i det siste. Dagali og Geilo nyt elleve minusgradar i dag, og på Konnerud i Drammen var det seks minus i morgontimane.
Snøen kjem frå onsdag av og held fram til over helga.
– Men mest i helga, seier statsmeteorologen.
- Les også:
Lite sannsynleg med skiføre i låglandet
Skog- og naturforvaltar i Drammen kommune, Bjørn Ringstad, tvilar på at snødrysset som kan komme til helga utgjer den store skilnaden for dei som lengtar etter skiturar i marka.
– Vi må nok ha 25 cm snø før vi kan køyre løypene i Drammensmarka, så eg tvilar på at dette held.
Det er moglegheiter for nokre rundar med ski på beina i Lier rundt Eiksetra, og i nærleiken av skiarenaen på Konnerud i Drammen. Men utanfor rekkevidda til snøkanonane er det mykje grønt føre.
Og sjølv om det er moglegheiter i høgare strok i Buskerud, blir årets skisesong lite å skryte av.
– Eg trur det BLIR skiføre ein eller gong i vinter, men årets skisesong blir kort, spår Ringstad.