Nynorsk

Kringkastingsprisen til Eivind Molde

Kringkastingsprisen vart i dag delt ut til Eivind Molde, mangeårig nyheitsjournalist i NRK. Prisen vert delt ut av Kringkastingsringen kvart år.

«Prisvinnaren har gjort ein særs verdfull innsats for god journalistikk på nynorsk – utan å stikke seg fram. For han er det sjølve journalistikken og formidlinga av bodskapen som er viktig. Han er kjend for eit kortfatta og enkelt språk og er ein av få journalistar som legg vekt på å bruke nynorsk normaltalemål.», står det i grunngjevinga.

Prisen har vore delt ut sidan 1978, og går til ei røyst som utmerkjer seg med godt språk i radio eller fjernsyn, og som på ein framifrå måte brukar nynorsk eller dialekt i det daglege arbeidet.

Prisvinnaren får eit diplom og eit kunstverk, i år laga av biletkunstnaren Erlend Wiggen Bliksrud.

Google kjem på nynorsk

Google har denne veka stadfesta at dei vil følgje den nye opplæringslova og tilby skriveprogram på nynorsk.

– Dette er ein stor siger for elevane og alle som skriv nynorsk i Noreg, seier Peder Lofnes Hauge, leiar i Noregs Mållag.

Nesten éin av fire grunnskular bruker i dag mest skriveprogrammet frå Google til skulearbeid.

– Helseplattforma må kome på nynorsk

Landsmøtet i Noregs Mållag vedtok i helga ei fråsegn der dei krev at helseplattforma må kome på nynorsk.

– Helse Midt-Noreg er i ferd med å innføre Helseplattforma utan at den er tilgjengeleg på nynorsk. Helseføretaka er underlagt språklova og lyt følgje henne, skriv dei i ei pressemelding.

Dei vektlegg at korrekt og forståeleg kommunikasjon i helsevesenet er viktig, både internt og i møte med brukarane.

– Å kunne bli møtt med og bruke sitt eige språk skaper nærleik og tillit. Det er ei kvalitetssikring av kommunikasjonen. Difor må Helseplattforma finnast på nynorsk. Landsmøtet i Noregs Mållag stør Volda kommune sitt krav om at plattforma må vere tilgjengeleg på nynorsk før ho blir tatt i bruk, og legg til grunn at Helse Midt-Noreg syter for at det blir varetatt før vidare utrulling, meiner Noregs Mållag.

Målprisen 2024 til Nana Rise-Lynum

Nana Rise-Lynum frå Hjørungavåg i Hareid får Målprisen 2024. Ho er redaktør i Norsk Barneblad og har vore det sidan 1999. Målprisen er den høgste prisutmerkinga i Noregs Mållag og vert delt ut av styret.

– Takk for at du har gjort Norsk Barneblad til eit levande og aktuelt magasin som aukar den nynorske leselysta blant born og unge. Norsk barneblad er betre enn nokon gong på grunn av deg, sa Peder Lofnes Hauge, leiar i Noregs Mållag, då han gav prisen til Nana Rise-Lynum.

Norsk Barneblad er truleg det eldste magasinet for born i verda. Det har blitt gjeve ut samanhengande sidan 1887.

Valt inn i styret i Noregs Mållag

Monika Haanes Waagen frå Herøy innstilt som nytt styremedlem i Noregs Mållag. Det skjedde på landsmøtet til mållaget. I 2020 var ho initiativtakar til Nynorsk Bedriftsforum, og er nyleg avgått leiar av Herøy Mållag, skriv Noregs Mållag i ei pressemelding.