Eivind Molde får Kulturdepartementets nynorskpris for 2020

Språkprisen skulle eigentleg bli delt ut under Dei nynorske festspela i Ørsta 12. juni. Men på grunn av koronapandemien, skjedde utdelinga i staden på ei samling i NRK, der ein overraska prisvinnar fekk prisen på 75. 000 kroner og eit kunstverk av kunstnaren Karen Helga Maurstig.

I grunngjevinga la juryen vekt på at Molde gjennom fleire år har bidrege til god nynorsk i både TV og radio og på nett.

– Årets prisvinnar bruker eit klart og tydeleg språk, og set nynorsk normaltalemål i høgsetet. Han har ei særleg evne til å forklare kompliserte forhold på ein enkelt og forståeleg måte for den jamne lyttar, sjåar og lesar, sa juryleiar Solveig Barstad då ho delte ut prisen.

Snakke slik folk forstår

Eivind Molde har arbeidd i NRK i over 30 år, og har blant anna hatt verv i NRK sitt språkutval og vore språkkontakt i NRK. Dei siste åra har han spesialisert seg på klima- og miljøsaker. Han har blant anna dekka FNs klimakonferanse og vore på Sørpolen for NRK.

• Les: NRK har greidd nynorskkravet
• Les: Kva er rett og god nynorsk?

Prisvinnaren blei overraska under overrekkinga, men var glad for at han blei sett pris på.

– Det har vore viktig for meg å bruke ein nynorsk folk forstår. Uansett kva situasjon folk er i, kva bakgrunn dei har, kva dialekt dei har, er det viktig dei forstår det dei høyrer når dei får det servert frå NRK, sa Molde då han fekk prisen.

Fremme nynorsk i media

Nynorskprisen til Kulturdepartementet blei delt ut første gong i 2006, då Linda Eide fekk prisen. Seinare har blant andre NRK-programleiar Ronny Brede Aase, journalist og forfattar Jan Zahl og journalist og forfattar Jon Hustad fått prisen. I fjor gjekk prisen til Kjersti Mjør i Bergens Tidende.

Ifølge statuttane til prisen skal han gå til «ein dyktig journalist som har utmerka seg med bruk av levande og god nynorsk i norske media, og som gjennom arbeidet sitt har gjeve nynorsken status og innpass på nye område».

I tillegg til juryleiar Solveig Barstad har juryen bestått av Inger Johanne Sæterbakk som er språkkonsulent på Det Norske Teatret og Øystein A. Vangsnes som er professor ved Universitetet i Tromsø og Høgskulen på Vestlandet i Sogndal.