Ny hetebølge på veg mot Europa

Ei ny hetebølge er på veg mot sentrale og nordvestlege delar av Europa denne veka.

Enkelte stader i Storbritannia, Tyskland og Frankrike kan få temperaturar opp mot 36 grader, skriv avisa Bloomberg.

Yr melder temperaturar på 29 grader i Oslo på torsdag og fredag.

Hetebølga kjem etter ein eksepsjonelt tørr sommar der Frankrike registrerte den tørraste juli-månaden nokosinne og Storbritannia den tørraste på 90 år.

Tørka har allereie sette elva Rhinen med så låg vasstand at tankskip ikkje kan segle fullasta, ifølge Reuters.

Den franske statsministeren Elisabeth Borne seier ifølge Euronews at landet står framfor den verste registrerte tørka i historia, etter at over 100 kommunar i landet manglar nok vatn.