LO-forbundet Industri Energi og arbeidsgjevarorganisasjonen Norsk Industri klarte ikkje å koma til semje innan meklingsfristen ved midnatt.
Industri Energi skriv i ei pressemelding at dei ikkje fekk innfridd kravet sitt om ein varig lønsauke for sine medlemmer, og tek dermed 190 vaskeritilsette ut i streik frå fredag morgon.
– Medlemmene våre vaskar for sjukehus, aldersheimar og for offshore. Mange har knapt nok løn til å forsørgja seg eller ha nok opptening til avtalefesta pensjon. Dei fortener eit solid lønslyft, seier forbundsleiar Leif Sande i Industri Energi til NTB.
Ifølgje forbundet er dei tilsette i vaskeri- og reinseribedrifter i hovudsak kvinner som tener 86 prosent av ei gjennomsnittleg industriløn.
Norsk Industri seier dei har strekt seg langt for å koma motparten i møte.
«Industri Energi kravde innføring av ei garantiordning som ville bety ei normalløn på minst 90 prosent av gjennomsnittet i industrien. Ei slik føresegn vil gje ein dramatisk lønsauke langt over tidlegare oppgjer, og den vil ha varig effekt», skriv Norsk Industri i ei pressemelding fredag.
Hotell og offshore blir råka
Det er i hovudsak tilsette ved vaskeri og reinseri som vaskar og reinsar sengetøy, arbeidstøy, uniformar og kokketøy til hotell, offshorebedrifter og private i Bergen, Stavanger og Trondheim som blir tekne ut i streik.
Vaskeri som handterer sjukehus og helseinstitusjonar blir i større grad skjerma i denne omgang.
- Sjå oversikta over alle bedrifter som risikerer å bli tekne ut i vaskeri-streik her.
Oversikt over bedriftene som er tekne ut i streik fredag morgon:
- Berendsen Tekstil Service AS, Bergen
- Hygienisk Vask og Rens AS, Bergen
- Nor Tekstil AS, Bergen
- Nor Tekstil AS, Kvinnherad
- Nor Tekstil AS, Evanger
- Nor Tekstil AS, Stavanger
- Berendsen Tekstil Service AS, Sandnes
- Renseriet Sandnes, Sandnes
- Berendsen Tekstil Service, Trondheim
- Nor Tekstil AS, Midtre Gauldal, Sør-Trøndelag
- Storvask AS, Trondheim
- Trondheim Vask og Renseri AS, Trondheim
- Nor Tekstil AS, Austrheim
- Agder Sentralvaskeri A/S, Tvedestrand
- Kvikk Vask & Rens AS, Mo i Rana
