Lula Tekle hamna i søkjelyset til media då tidlegare Oslo-biskop Gunnar Stålsett i 2019 stod fram i Vårt Land og fortalde at han i 14 år hadde gitt jobb til ein ureturnerbar asylsøkjar utan opphaldsløyve. Kvinna hadde fått endeleg avslag på asylsøknaden sin.
Seinare same år vart Stålsett dømt til fengsel på vilkår i 45 dagar og ei bot på 10.000 kroner for brot på utlendingslova.
No har Lula Tekle fått opphaldsløyve i Noreg, med visse avgrensingar. Det stadfestar ho sjølv og fleire støttespelarar overfor Vårt Land.
Ho er dermed ein av dei første som har fått innvilga opphaldsløyve gjennom Solberg-regjeringa si «eingongsløysing for eldre, ureturnerbare asylsøkjarar som har budd lenger enn 16 år i Noreg».
Opphaldsløyvet er mellombels og varer i eitt år.
Grunngivinga er «tvil om identiteten til klagaren». Skal ho få fast opphald, må ho skaffe pass frå heimlandet sitt. Det meiner Utlendingsnemnda (Une) er Etiopia. Sjølv seier Tekle det er Eritrea.