Aftenposten meldte nyleg at tilsette i Arbeidstilsynet har vore misnøgde med leiinga i lang tid.
Difor leverte fleire tilsette eit varsel om dårlege arbeidsforhold til Arbeids- og likestillingsdepartementet.
I dag vart det klart at Trude Vollheim trekker seg frå stillinga som direktør.
Vollheim seier ho ikkje kjenner seg igjen i kritikken frå dei tilsette.
.
– Sjølv om eg i stort ikkje kjenner meg igjen i skildringa av Arbeidstilsynet som blir gitt i varselet og media, vil eg av omsyn til alle leiarar og tilsette nå fråtre slik at etaten forhåpentleg kan få ro til å konsentrera seg om det viktige samfunnsoppdraget som etaten har, skriv Vollheim i ei pressemelding frå tilsynet.
– «Fryktkultur»
Rett før jul leverte tilsette ved Arbeidstilsynet eit varsel til Arbeids- og inkluderingsdepartementet.
Ifølgje Aftenposten skildra dei tilsette arbeidsmiljøsituasjonen som «kritikkverdig», «helseskadeleg» og prega av «fryktkultur».
Aftenposten skriv at Trude Vollheim og resten av leiinga vert kritisert.
Ifølgje avisa skal det i varselet vera vist til «fleire faktiske lovbrot» på arbeidsmiljølova.
Då NRK prøver å kontakta Vollheim for fleire spørsmål, viser ho til pressemeldinga.
Ronny Jørgenvåg er nå fungerande direktør i Arbeidstilsynet. Han understrekar at dei tek varselet på alvor.
– Det er viktig for oss å bidra til å klargjera saka så godt me kan og bidra til ein ryddig prosess vidare. Fram til departementet har gitt tilbakemeldinga si, kan me ikkje seia noko meir om saka, seier Jørgenvåg.
– Er klar over varselet
Arbeids- og inkluderingsminister Tonje Brenna (Ap) seier ho registrerer at Vollheim har vald å trekka seg frå stillinga.
– Departementet er klar over varselet, men det er direktøren sjølv som har valt å trekka seg. Det respekterer eg, stadfestar Brenna.
Ho takkar for innsatsen Vollheim har lagt ned sidan 2017, og legg til at tilsynet held fram som vanleg.
– I Noreg skal me ha tryggleik i arbeidslivet, med ryddige forhold og trygge, gode arbeidsplassar. Me ynsker ein rettferdig og seriøs arbeidslivspolitikk, der alle bedrifter følger reglane. Arbeidstilsynet er ein viktig etat i dette arbeidet, med hovudoppgåve å avdekka arbeidskriminalitet og føra tilsyn. Denne innsatsen held fram med uforminska styrke, seier Brenna.