– Dette er eit ganske smart trekk frå Kiwi si side, seier NHH-professor Tor W. Andreassen.
Kiwi har den siste tida køyrt kampanjar om at kjeda er billigast, og pressar prisane nedover. I vinter har prisane vore «låste» på ei rekkje merkevarer.
Samtidig har Kiwi starta å skru opp prisane dei siste vekene, og særleg på Norgesgruppen sine eigne merkevarer som First Price og Eldorado.
– Prisstrategien er å tene pengar, sjølvsagt. Under dekke av at dei skal vere leiande på pris. Det er heile reklamen til Kiwi. «Vi gir oss ikkje på pris», seier Andreassen.
Her kan du sjå kor mykje prisane har auka utover våren:
Kiwi meiner NRK bør leggje til grunn ein høgare førpris for roastbiff og kjøttdeig fordi prisane var nedsette frå ein endå høgare pris då NRK sjekka førprisane.
Verre for kunden å oppdage
Norgesgruppen har betre marginar og meir kontroll over kostnadene i verdikjeda på eigne merkevarer, ifølgje Andreassen.
– Heile logikken er å tene pengar på varer som er innkjøpte på andre vilkår og kontraktar enn dei vanlegvis har, og ha større margin. Dei tener meir pengar på å flytte etterspurnaden over på denne kategorien, spesielt i ein periode der dei totalt sett har knappe marginar, seier han.
Leiar i Alo Analyse, Ivar Pettersen, meiner eigne merkevarer kan setjast opp i pris utan at kundane reagerer sterkt fordi den same vara ikkje nødvendigvis finst hos konkurrentane.
– Det er mykje lettare å sjå kva ein Gilde-pakke med pålegg kostar og samanlikne han på tvers av butikkar. Men desse ulike merkevarene verkar jo ulikt. Derfor kan prissamanlikningane bli litt vanskelegare, seier han til NRK.
Kiwi peikar på leverandørane
Kommunikasjonssjef Kristine Aakvaag Arvin i Kiwi seier til NRK at prisane har auka mindre enn prisauken Kiwi har fått frå leverandørane.
– Dei fleste av varene på lista er importvarer, og desse har fått store prisaukar på grunn av svak kronekurs, i tillegg til auka råvare-, energi- og transportkostnader, skriv ho i ein e-post til NRK.
Pettersen meiner daglegvarekjedene er pressa til å skru opp prisane fordi produsentane har auka prisane til kjedene.
– Det kan vere leverandøren av eigne merkevarer som står for prisauken, fordi det har skjedd ein kraftig prisauke i leverandørleddet som ikkje er teken ut på detaljistleddet. Det kan vere at leverandøren først tek det ut på eigne merkevarer, seier han.
Dobla i pris på eitt år
Som NRK har omtalt tidlegare, valde butikkane å skru opp prisen meir på eigne merkevarer enn andre varer i fjor.
Det siste året har mellom anna frosne bringebær, puffa ris og tørkerullar nærast vorte dobla i pris.
Prisforskjellen mellom eigne merkevarer og kjende merkevarer har derfor krympa.
First Price cornflakes 750 gram har til dømes vorte dobla i pris på eitt år, medan Kelloggs cornflakes 500 gram har stått stille i pris.
– Dei kan setje prisane i marknaden heilt sjølv, fordi det blir oppfatta som eit lågprismerke. Så dette er ein ganske smart strategi i ei pressa tid for Kiwi og daglegvarebransjen. Dei må ha lønnsemd, og dette er éin måte å gjere det på, seier Andreassen.