– Det er ikkje vegen å gå i dagens situasjon, seier sjeføkonom i LO, Roger Bjørnstad.
Fagforeininga ynskjer heller at pengane brukast på kompetanseheving i skulen og på arbeidsplassar, for å sikre at sysselsettinga utviklar seg i positiv retning.
– Dei store utfordringane i norsk økonomi er talet på dei som fell utanfor arbeidslivet. Sjølv om ledigheita fell, er det sterk vekst i den skjulte arbeidsløysa, med folk som hamnar utanfor arbeidsmarknaden, forklarer han.
For Framstegspartiet er målet så låg skatt som mogleg, dermed ber Bjørnstad finansminister Siv Jensen om å ta eit lite populært val.
– Eg kan godt forstå at folk ynskjer seg lågare skatt, men det vil ikkje bidra til den veksten vi treng. Vi må bruke pengane på viktige tiltak for å få fleire inn i arbeidslivet, seier han.
- Les meir:
Virke: – Behov for midlar til fornying i bedriftene
Hovudorganisasjonen Virke, som representerer over 20.000 verksemder i norsk næringsliv er derimot av ei anna oppfatning.
– Skattekutt vil heilt klart bidra til at det kjem meir midlar inn i bedriftene, som gjer at vi sikrar arbeidsplassar, også nye verksemder, seier administrerande direktør Vibeke Hammer Madsen.
Ho meiner det er eit sårt behov for reduksjon i selskapsskatten og i formuesskatten på arbeidande kapital.
– Dette vil vere pengar som kan gå rett inn i verksemdene og bidra til den teknologiomstillinga vi treng, men også ei miljøomstilling som bedrifter står midt oppe i.
– LO vil bruke midlane heller på tiltak for dei som står utanfor arbeidslivet, er ikkje det god bruk av midlane?
– Då trur eg meir på å starte med verdiskaping i bedriftene, i staden for å bruke offentlege midlar aleine, seier Madsen.
- Les meir:
- Les meir:
Økonom: – Ikkje behov for skattekutt
Sjeføkonom i pengeforvaltaren Storebrand, Olav Chen, meiner skattekutt kan føre til fleire arbeidsplassar i dårlege tider, men at behovet ikkje er like stort når ting går betre.
– Eg er einig med LO i at det ikkje er naudsynt med fleire skattekutt og samtidig ein ekspansiv budsjettpolitikk.
Han peikar på at det vert mindre pengar i potten til sjukehus, samferdsle, skule og framtidige arbeidsplassar dersom ein kuttar i skatten, men aukar oljepengebruken, slik som regjeringa har gjort tidlegare.
– Då vert det mindre til komande generasjonar. Slik pengebruk er ikkje berekraftig, seier han.