Jehovas vitne sende personleg invitasjon til autistisk 16-åring

I brevet, som var stila direkte til guten, blir han invitert til å lære meir om det omstridde trussamfunnet og ta kontakt.

– Ring meg gjerne på mobil / SMS dersom du synest noko av dette er interessant, skriv eit medlem av Jehovas vitne i brevet til guten.

16-åringen bur i Buskerud.

Dei hevda også at dei hadde ringt han utan å få svar.

– Sonen min er autist, heldigvis opnar han ikkje posten sin sjølv. Eg opnar alltid posten hans, han følgjer ikkje opp posten sin sjølv, fortel mor hans til NRK.

Blei overraska

Ho er både oppgitt og sint på Jehovas vitne for at dei tar direkte kontakt med den mindreårige sonen hennar på denne måten.

– Eg trur at det er mange som ikkje heilt forstår kva dette går ut på, og som blir med på noko dei ikkje burde bli med på, fortel mora.

Ho ber om å få vere anonym av omsyn til sonen.

– Eg blei veldig overraska over å finne eit handskrive brev til han med beskjed om at dei hadde prøvd å ringe. Det har dei ikkje gjort.

Kasta ikkje brevet

Det er ikkje første gong at folk reagerer på Jehovas vitne sine rekrutteringsmetodar.

I 2020 sende dei brev til ei åtte år gamal jente i Trøndelag.

Den gongen la dei seg flate og tok sjølvkritikk.

Mora til den 16 år gamle autistiske guten i Buskerud vurderte om ho berre skulle kaste brevet han fekk.

Men sidan brevet var signert og det var skrive eit telefonnummer, så ringde ho.

– Eg sa til dei at eg ikkje vil ha slike brev i posten. Her hos oss er vi opne for både fargar, tru og alle slags legningar. Dette krasja veldig med det vi trur på, seier kvinna.

Vil ikkje ha kontakt

Mora til 16-åringen fortel at den som tok telefonen hos Jehovas vitne, hevda at meinigheita brukar skattelistene for å finne ut kven dei skal sende brev til.

– Sonen min har inga inntekt og er sjølvsagt ikkje på skattelistene, kommenterer ho tørt.

No vil ho at Jehovas vitne ikkje kontaktar dei igjen.

– Hadde vi ønska kontakt med Jehovas, så hadde eg tatt kontakt. Det dei gjorde her gagnar dei ikkje.

NRK har gjort fleire forsøk på å få tak i personen som har signert brevet. Vedkomande har lese meldingane vi har sendt, men ønskjer ikkje å seie noko.

Svar frå Danmark

Vi har også snakka med kontaktpersonen for den aktuelle meinigheita. Han syner vidare til Jehovas vitne sitt hovudkontor for Skandinavia i Danmark.

Dei svarar på e-post:

– Vi kjenner ikkje til det spesifikke tilfellet som du nemner, men om vi har fornærma eller bekymra nokon ved forkynninga vår ønskjer vi å be om unnskyldning for dette.

Det skriv kommunikasjonsrådgjevar Fabian Fond.

Nedanfor kan du lese heile svaret frå Jehovas vitne.