Fleire hundre tusen menneske i Noreg risikerer synet når dei røyker, åtvarar ekspertar.
Røykarar har dobbelt så stor sjanse for å miste synet samanlikna med personar som ikkje røyker, skriv BBC.
Sjølv om samanhengen mellom røyking og sviktande syn er tydeleg, veit altså berre ein av fem at røking kan gjere deg blind, visar ei undersøking gjort av foreininga for optometri (AOP) i Storbritannia.
– Folk veit som regel om koplinga mellom røyking og kreft, men mange er ikkje klare over påverknaden røyking kan ha på auga, seier Aishah Fazlanie i AOP.
Røyking påverkar synet
Tobakksrøyk inneheld giftige kjemikal som kan irritere og skade auga. For eksempel kan tunge metall som koppar og bly, bli samla opp i augelinsa bak pupillen og føre til grå stær.
Røyking kan gjere synsproblem som er relaterte til diabetes verre. Måten det skjer på, er at røykinga skadar netthinna på baksida av auget, skriv den britiske kringkastaren.
Det er tre gongar meir sannsynleg at røykarar får noko som heiter aldersrelatert macula degenerasjon (AMD). Dette er ein tilstand som svekker den gule flekken i auget og fører til at ein mister evna til å sjå detaljar. Meir enn kvar tiande person over 70 år i Noreg har mista lesesynet på grunn av AMD.
I tillegg er det også 16 gongar meir truleg at røykarar utviklar plutseleg synstap. Det kjem som følge av at blodtilføringa til auget blir blokkert.
- Les også:
Røykeslutt-hjelp
I undersøkinga, som om lag 2000 vaksne personar tok del i, svarte berre 18 prosent at røyking aukar risikoen for at synet blir svekka eller at ein blir blind.
– Røyking aukar risikoen for svekka syn, og er ein viktig grunn til at røykarar burde vurdere å stumpe røyken, seier Aishah Fazlanie i den britiske foreininga for optometri til BBC.
Foreininga seier at å slutte med å røyke er noko av det beste ein kan gjere for å ta vare på synet.
Færre røyker i Noreg
Dei siste åra har færre og færre røykt i Noreg. Blant unge har delen som røyker gått kraftig ned dei siste ti åra. Den siste Helseundersøkinga i Nord-Trøndelag viste at berre 0,4 prosent av ungdommar mellom 13 og 19 år røyker dagleg.
For den vaksne befolkninga, som er mellom 16 og 74 år, røykte 12 prosent dagleg i 2018, viser tal frå SSB. Det er litt over 300.000 personar – ein klar nedgang frå 2008, kor 21 prosent røykte dagleg.
- Les også: