Venta på Veslemannen i fem år – var i Syden då raset gjekk

– Eg skulle no gjerne ha opplevd det, men den gong ei, seier Lødøen til NRK.

Då det rasutsette fjellpartiet Veslemannen for alvor begynte å skyte fart den siste veka fekk Vegard Lødøen eit tjuetals telefonar frå folk som lurte på om han var i området – slik han ofte brukar å vere når det er raudt farenivå.

Det har blitt mange turar og eit utal timar nede i fjellsida for Lødøen, som har selt bilde til fleire mediehus.

Han har følgt utviklinga nesten dagleg, og når det skjedde ting i fjellet var han ofte budd på å hoppe i bilen.

Såg raset frå hotellrommet

Men då raset kom på torsdag måtte Lødøen følgje med på pc-skjermen frå hotellet i Split. Dei hadde allereie bestilt ei veke lang ferie, og å avbestille var uaktuelt.

– Kva trur du familien hadde sagt då? Kona er viktigast, eg valde henne føre Veslemannen, held Lødøen fram.

Han synest det var fascinerande å sjå raset på TV-sendingane, og fekk likevel stemninga.

– Det var spektakulært, og gjekk raskare enn eg hadde trudd, seier han.

Det er likevel eit motiv frå Veslemannen han gjerne skulle foreviga.

– Då raset slo ned i bakken lengst nede, med steinar som sprutar ut over terrenget. Akkurat det skulle eg gjerne ha hatt nærbilde av, fortel han.

• LES OGSÅ: Her er «Seigmannen» som held igjen raset

Har sett seg nye mål

Lødøen fortel at han er ein tolmodig sjel, som nok kjem noko til å følge med på andre fjell, til dømes Åkerneset i Stranda. Eit skred der i framtida kan truge turistbygda Geiranger.

Elles kjem han til å fotografere dyr. Det kan ikkje måle seg med eit dramatisk ras, men han har eit draumemotiv, som han trur vil gjere det.

– Eg prøver på ein brølande hjort på 20 meters hold, det blir hovudfokus framover. Då gløymer eg fort Veslemannen inntil vidare.