Private aktørar tek truleg over drifta av Hatlane omsorgssenter – stor frustrasjon hos dei tilsette – NRK Møre og Romsdal

Private aktørar tek etter alt å dømme over pass og pleie av dei nesten 60 gamle og sjuke på Hatlane omsorgssenter i Ålesund. Det bestemte kommunestyret med stort fleirtal torsdag kveld.

Dette skjer trass i sterk motstand.

– Sånn som det er i dag, er dei som bur der veldig fornøgde med dei som jobbar der, at dei kjenner dei og viser dei omsorg. Svogeren min kallar dei for «perler» seier Britt von Løwensprung.

Ho er pårørande til ein av dei som bur på Hatlane og er leiar for Ålesund og omegn Demensforening.

I forkant av møtet sende ho eit brev til politikarane der ho bad dei droppe planane om privatisering.

Det førte ikkje fram.

– Vi ønskjer eit mangfald av tenester innanfor helse og eldreomsorg i Ålesund for å finne den beste mogleg måten å drive eldreomsorg på. For oss er det ikkje viktig om det er det offentlege eller private som driv, berre kvaliteten er best mogleg, seier ordførar Håkon Lykkebø Strand (Frp).

Argument for og mot privatisering av eldreinstitusjonar

✅ Argument som blir brukt for privatisering av eldreomsorg:

Konkurranse kan gi betre kvalitet og lågare kostnader
Private aktørar må konkurrere om kontraktar, noko som kan føre til meir effektiv drift og betre tenester
Private selskap blir ofte rekna som meir fleksible og i stand til å prøve ut nye løysingar raskare enn offentlege institusjonar
Større valfridom for brukarar, til dømes mellom ulike typar sjukeheimar med ulik profil
Kommunar med pressa økonomi kan bruke private aktørar for å sikre kapasitet utan å måtte byggje og drifte alt sjølve

❌ Argument mot privatisering av eldreomsorg

Kritikarar fryktar at private aktørar kuttar i bemanning og kompetanse for å spare pengar, noko som kan gå ut over bebuarane
Når tenester blir drivne av private, misser kommunen direkte styring og innsyn i drifta
Dømet med Smartlegen i Oslo viser at selskap utan erfaring kan vinne anbod, noko som skaper usikkerheit om kvalitet og kontinuitet
Fagforeiningar peikar på at tilsette i private institusjonar ofte har lågare løn og dårlegare pensjonsordningar enn i det offentlege
Fleire kritikarar meiner at privatisering ofte skjer av ideologiske grunnar, ikkje fordi det er dokumentert betre for brukarane

Vil spare pengar

Det handlar om pengar når politikarane no held fram prosessen for å få private aktørar til å ta over drifta av sjukeheimen i Ålesund.

Målet er å spare minst 3,6 millionar i året.

– Det er viktig å ha med seg at kommunen er i ein pressa situasjon økonomisk, og det vil vere viktig at grep som å konkurranseutsette ein institusjon, også gir økonomiske innsparingar, skriv kommunedirektør Jon Steven Hasseldal i framlegget til politikarane.

Tidlegare denne veka blei det klart at kommunane får 1, 6 milliardar meir i revidert statsbudsjett. Det rokkar neppe ved planane i Ålesund.

Ein ny forskingsrapport viser at rundt 8 % av kommunane i landet har sleppt private til i drifta av eldreinstitusjonar.

Dette er kommunar som Austevoll, Bærum, Oslo og Bergen. I Oslo har privatiseringa skapt rabalder.

I NRK sin partiguide kan du samanlikne korleis dei ulike partia stiller seg til privatisering av eldreinstitusjonar:

Åtvarar mot privatisering

Det finst lite forsking på kva som skjer med kvaliteten når private tek over, men kritikarane er ikkje nådige.

Både tilsette og tillitsvalde ved Hatlane omsorgssenter er kritiske til planane, men har ikkje fått gehør. Torsdag møtte dei opp med plakatar i kommunestyresalen.

Fryktar noko

Britt von Løwensprung er pårørande til ein av dei som bur på Hatlane og leiar for Ålesund og omegn Demensforening.

Torsdag ettermiddag troppa ho opp på demonstrasjonen utanfor rådhuset, og følgde så debatten i kommunestyresalen.

– Det beste som kan skje er at dei som jobbar der, dei som er pårørande og dei som bur der, får det minst like godt som dei har det i dag, seier ho.

Politikarane bestemte seg likevel for å gå vidare med prosessen.

Det er førebels ikkje klart kven som eventuelt vil ta over drifta. Etter planen vil ikkje det vere klar nokon ny drivar før tidlegast ved årsskiftet.

Retting: I første versjon sto det at Eldrerådet i Ålesund er skeptisk til konkurranseutsettinga. Det stemmer ikkje. Retta klokka 20.06.