Mild vinter gir tidleg pollensesong

Hopp til innhold

Fakta om pollenallergi

Meir enn 40 prosent av befolkninga får allergiske reaksjonar ein eller fleire gonger i livet. For dei fleste dreier det seg om milde symptom. Meir alvorlege allergiplager er det for 10 - 20 prosent.
Symptoma varierer alt etter årsaka til reaksjonen og kva for del av kroppen som er involvert.
Pollenallergi gir i første rekkje plager frå nese og auge, men det kan også vere symptom som hovudpine, eller at du er slapp, trøtt og har nedsett konsentrasjonsevne.
Mange pollenallergikarar kan oppleve at dei får ubehag i munn og svelg når dei et rå frukt og grønnsaker, særleg i pollensesongen. Årsaka er at dei allergiframkallande stoffa i pollen liknar på protein i maten.
Det kan vere mogleg å førebygge allergi viss barnet får brystmjølk dei første fire til seks månadene. Gravide bør ikkje røyke, og barn må ikkje bli utsatt for tobakksrøyk. Og du bør tilstrebe eit best mogleg inneklima.
Pollentypen med størst betydning ved allergi kjem frå tresortane or, hassel og bjørk. I tillegg har vi pollen frå Salix (pil, selje og vier) og pollen frå burot og grasartar. Muggsoppsporer kan også gje liknande plager.
Nærare 1 million nordmenn har pollenallergi. Mange er så plaga at det går utover livskvaliteten. Då er det viktig å få stilt rett og tidleg diagnose.
Ubehandla pollenallergi kan lettare utvikle seg til astma.

Kjelde: Astma- og Allergiforbundet

Mange stader i landet har vinteren så langt vore grøn og varm. Dersom mildvêret held fram vil blomstringa snart starte for artane som normalt kjem tidleg om våren.

– Det kan godt vere at pollensesongen startar tidleg i februar, seier pollenanalytikar Hallvard Ramfjord ved NTNU. Dei set i gong overvakinga av pollenspreiinga 20. januar.

Starta seinare før

På 80-talet var det normalt at spreiinga av pollen starta i månadsskiftet mars/april. Stadig oftare dei siste åra har sesongen starta tidlegare. Rekorden er 3. januar i 2008 i Oslo.

For allergikarar betyr ein tidleg start av pollenspreiinga at sesongen med rennande nase og auge vert forlenga. Artane som blomstrar tidleg vert påverka av temperaturen og startar dermed før. Artane som kjem seinare på sommar og tidleg haust flyttar seg ikkje.

– Sesongen totalt blir utvida og det er ikkje bra for dei som er allergiske, forklarar pollenforskaren.

LES OGSÅ:

Er ikkje klar

Monica Dalseth er regionsekretær i Norges Astma og allergiforbund i Møre og Romsdal. Ho gruar seg til pollensesongen.

– Eg er ikkje klar for ein lang pollensesong. På kroppen kjennest ut som den førre sesongen akkurat er ferdig, seier Dalseth.

Tøff kvardag

Mange av pollenallergikarane har ein tøff kvardag og slit med hovudpine, kløe på kroppen og rennande nase og auge. Det er også vanleg at mange reagerer på enkelte matvarer i pollensesongen. Dalseth er vand med å ta mange forholdsreglar når det står på som verst. Å unngå å lufte og henge ut klede er eit av tiltaka.

– Vi kan godt få litt kulde no, slik at starten vert utsett. Eg gruar meg, seier Dalseth.

Kulde kan bremse

Pollenforskar Hallvard Ramfjord fylgjer nøye med vêrvarsling, men ser så langt lite som tyder på at blomstringa vert utset. Likevel tar han ikkje sorgene på forskot.

– Vi er tidleg i januar og plutseleg kan det kome kuldegrader. Då stoppar det heile opp, seier Ramfjord.