Her står sauene flodfaste

Villsauane på Hjertøya utanfor Molde blei overraska over den høge vasstanden. Då vatnet steig stod dei att på eit lite skjer, og trong hjelp til å kome seg til land.

Sauer står fast på Hjertøya i Molde

Sauene hadde vandra ut på eit skjer frå Hjertøya utanfor Molde. Så kom floa og fjerna vegen tilbake.

Foto: Odd Terje Heimen

Heile flokken på 25 dyr blei redda opp i båt og er no frakta tilbake til Hjertøya.

Det var Odd Terje Heimen som oppdaga sauene som stod fast på eit skjer ved Hjertøya i Molde, då han skulle ut i båt og sjå på den store vasstanden.

– Fleire av sauene stod med vatn til knea, seier Heimen til Romsdals Budstikke.

Sauer blei flofaste

Det var fleire som drog ut for å berge sauene i båt.

Foto: Pål Gaasøy

Sette i gang ein redningsaksjon

Det blei starta ein redningsaksjon for å få sauene på trygg grunn. Seks stykker drog ut for å ta sauene tilbake til øya. Sauene skal ikkje ha vore vanskeleg å få med seg.

– Vi brukte båtar som er bygd for å frakte sau. Vi hadde med oss noko mat til dei, så dyra gjekk om bord i båten sjølv, seier Gaasøy, som var blant dei som hjelpte til.

Sauene stod på eit skjer, som ein kan gå tørrskodd til på fjøre sjø.

– Dei har blitt overraska av floda, seier Gaasøy.

Sauer flofaste Molde

Dei 25 sauene er no trygt tilbake på Hjertøya, der dei skal vere.

Foto: Pål Gaasøy

– Vi er sjeleglad

Saueeigar Kjell Paulsen skulle eigentleg sjå til dyra på måndag, men dårleg vêr gjorde at dei utsette det. Han er glad for at dei blei varsla om at dyra var i fare.

– Vi er sjeleglad for at folk seier frå når det skjer noko med dyra, så vi kjem oss ut med ein gong og får tatt affære, seier Paulsen.

Det var heile flokken hans som stod flod-fast.

– Det ville vore forferdeleg viss det skulle skje noko med dyra.

Venta meir høg vasstand

Paulsen seier det er sjeldan dyra går ut på skjera på vinteren, og blei overraska over at dei stod på akkurat dette skjeret.

– Viss det hadde blitt ein halvmeter-meter høgare springflod i natt, spørst det korleis det hadde gått, seier Paulsen.

Det er høg vasstand langs heile kysten, frå Østfold til Møre og Romsdal. Det er venta ein topp etter midnatt og ein ny topp onsdag ettermiddag.

Ekstremværet «Didrik»

Varselet er raudt i Agder, Rogaland og Sunnhordland, oransje på Aust- og Vestlandet og gult i Trøndelag.

Grafikk: Meteorologisk institutt