Vil gå i forhandlingar med Torghatten om ny ferje

– Med litt meir dritvêr i haust og til vinteren så kan dette bli ei stor utfordring.

Torgeir Dahl (H) var tydeleg då han tok ordet. Noko må skje i ferjesambandet Dryna-Brattvåg, meiner han. Ferja «Haram» er frå 1979. Næringslivet og folk som bur i Midsund krev ei ny og betre ferje. Dei meiner at situasjonen er uhaldbar.

Næringslivet på øya er avhengig av at ferja går dersom dei skal levere varer og tenester.

Kanselleringar

I vinter fekk øyfolket nok etter at det hopa seg opp med kansellerte avgangar. Over 1200 skreiv under på eit opprop om å skifte ut den 45 år gamle ferja.

I august hamna ferja på verkstad. Ei like gammal reserveferje blei sett inn. Igjen blei det kanselleringar. Og nok ein gong kokte det på øya.

Under møtet i samferdselsutvalet blei det lagt fram tal som viser at det ikkje har vore mange kanselleringa frå i vinter og fram til i sommar. Men spørsmålet er om den gamle ferja vil tole ein haust og ein vinter med mykje dårleg vêr.

– Det er illusorisk å tru at dette vil gå bra framover. Dette må vi finne ei løysing på, sa Torgeir Dahl.

Omdømme

Onsdag fremma han eit forslag i samferdselsutvalet i Møre og Romsdal der fylkeskommunedirektøren blir bede om å gå i forhandlingar med Torghatten som er ansvarleg for sambandet. Det fekk samrøystes støtte

Kontrakten inneheld ein opsjon som opnar for at ei yngre ferje kan bli sett inn i sambandet i løpet av kontraktperioden. No vil politikarane ha ei ferje som er bygd etter 1992.

– Torghatten vil stå seg på å imøtekome dei ønskja som har kome fram. Dette meiner eg er eit spørsmål om omdømme, seier Pål Farstad (V).

Pengar

Men det vil koste pengar. Og Møre og Romsdal fylkeskommune har ikkje pengar. Det er usikkert kva prislappen blir.

Lisa Alvestad (Sp) meiner det er heilt nødvendig å få på plass ei ny ferje i sambandet Dryna-Brattvåg. Men ho trur det politiske fleirtalet vil få problem med å finne pengane.

– Eg trur ikkje dei klarer å omprioritere godt nok i fylket slik at dei kan leggje inn dei pengane. Det kan dei gjerne prøve på, men eg har ikkje noko tru på at dette vil skje.

Fleire av politikarane i samferdselsutvalet understreka at dette ikkje måtte gå utover andre ferjesamband. Dei peika på Larsnes-Åram-Voksa-Kvamsøya på Søre Sunnmøre på som har hatt store utfordringar.

– Økonomien er veldig krevjande. Her må ein prioritere. Når vi får sakene tilbake så får vi sjå på det i forhold andre oppgåver som vi har. Men viljen er absolutt til stades, seier leiar i samferdselsutvalet Hans Olav Myklebust (Frp)