Ekstremvêret Ivar har herja i Møre og Romsdal. Vinden starta sterkast på Sunnmøre tidleg torsdag ettermiddag, men har utover dagen bevega seg stadig lengre nord og skapt store problem i heile fylket. På Nordmøre var det meldt vind opp mot orkan i styrke.
– Snart som normalt
– Vi gjekk tidleg ut med alle naudetatar samla. Vi trur av den grunn at vi har hatt så god kontroll, seier politioverbetjent Geir Kristoffersen ved Nordmøre og Romsdal politidistrikt.
– No går vi inn i normaliseringssituasjon. Bruane er opna, men folk må ta omsyn, seier han til NRK i 19-tida.
– Mitt inntrykk er at folk har høyrt på dei tilrådingane som har kome, legg han til.
Lærte av Dagmar
Trass i sterk vind, har det ikkje skjedd alvorlege hendingar. Kristiansund kommune meiner dei har lært av ekstremvêret Dagmar som raste for to år sidan.
– Eg føler at vi hatt veldig god kontroll. Vi har hatt ein del utfordringar. Faktisk hadde vi tømt alle skulane før uvêret, seier Torbjørn Sagen som er beredskapsleiar i Kristiansund Kommune.
- Les også:
Klokka 18 vart kriseleiinga i Kristiansund kommune permittert og sett i kvilande beredskap. Framleis er beredskapen høgare enn elles, står det på heimesidene til Kristiansund kommune.
Framleis straumlause
Svært mange mista straumen på i Romsdal og spesielt på Nordmøre torsdag ettermiddag.
– Det har vore mange som har vore straumlause, men det blir færre og færre no, seier Ole Erlend Gaupseth i Nordmøre Energiverk AS (NEAS) til NRK i 19.30-tida.
- Les også:
I Aure er fleire hundre menneske straumlause. På Smøla og i Tingvoll er om lag 150 personar utan straum, medan Averøya har rundt 50 personar utan straum. Også på Åfarnes i Rauma er dei framleis straumlause.
– Vi er i gong med å få i gong att ting på Tingvoll, og det kjem snart på plass andre stader også, seier Gaupseth.
SISTE klokka 21.34: Smøla og Averøya har fått att straumen, men NEAS har framleis trøbbel på Aure og Tingvoll. Åfarnes i Rauma har fått att straumen.
Ekstremvêret Ivar raste torsdag ettermiddag gjennom Møre og Romsdal før ferda gjekk vidare til Trøndelag.
- Sjå TV-reportasje:
Foto/redigering: Roar Halten
