Bella (85) håper Mannen rasar no

Alle snakkar om Mannen og det venta skredet. På apoteket i Åndalsnes sentrum møter vi folk onsdag morgon. Dei har følgt nyheitssendingane etter at farenivået igjen blei heva til raudt, og håper det snart skjer noko.

– Det er veldig spennande, eg bur i Fjellgata og ser opp i fjella kvar einaste dag med kikert, seier Bella Rovick.

Les også:

• Fremdeles rødt farenivå ved Mannen
• Mindre bevegelser i Mannen

Flyttar heimafrå for tredje gong

Det er tredje gongen på under to år at dei som bur rett under Mannen har måtte flytte heimanfrå. Tysdag ettermiddag måtte 11 menneske og fleire dyr forlate gard og grunn, fordi det er overhengande fare for at eit skred skal gå. Korleis det går med husa rett under veit ingen.

Rovick forstår godt at det tek på.

– Eg syns synd i dei folka som opplever dette. Det må vere heilt forferdeleg, seier ho, og legg til at ho trur skredet kjem denne gongen.

Les også:

• Beboer evakuert: – Håper det raser
• – Bevegelsene vil øke utover natta

Meiner styresmaktene bør gripe inn

Men det er mange som ikkje trur det skjer noko denne gongen heller, og fleire har forslag til tiltak.

Audun Unhjem frå Isfjorden i Rauma meiner styreksmaktene bør vurdere om det skal vere lov for folk å bu i området i det heile tatt.

– Styresmaktene bør vurdere om det skal bu folk der. No er det tredje gongen dei flyttar, det må vere eit voldsomt stress for dei, seier han.

– Kan ikkje den Mannen få litt hjelp, seier Aina Åmdal Hegg.

– Kva ville du gjort?

– Eg har jo ikkje peiling på kva som ville skjedd, men ei lita sprengladning ville eg lagt oppi der, seier ho.

Mange som spør om Mannen no

På Norsk Tindesenter er det onsdag formiddag fleire innom som spør om Mannen, etter å ha høyrt om fjellet i nyheitssendingane. Det svenske ekteparet Christina og Leif Engqvist skal køyre sørover Romsdaldalen, og lurer på kvar eksakt fjellet ligg. Dei kjem frå flate Uppsala i Sverige, og er imponerte over fjella.

– Eg kan ikkje tenkje meg noko anna enn kanskje deler av Kebnekaise-massivet (Sveriges høgste fjell, red.anmk.) kan vere så vilt, seier Engqvist.

– Vi er misunnelege på Noreg, slår ektemannen Leif fast.

Mange håper skredet går

Onsdag morgon gjekk NVE ut og sa at fjellet no har stabilisert seg noko, og at rørslene ikkje lenger er like store i Mannen. Det er også meldt finare ver dei neste dagane.

Dermed kan det igjen bli veker med venting og ein uavklart situasjon. May-Helen Tangen høyrde buldring i fjellet onsdag morgon og trudde Mannen raste. No håper ho det skjer fort.

– Kva er det beste som kan skje no?

– At han kom. Rett og slett. At det blei skikkeleg bulder og brak, og at han kom deisande ned, seier Tangen, og legg til at ho ikkje trur det skjer denne gongen heller.