Vuosi oon 1866 ja lukkiija saattaa löyttäät ittensä Kukkolasta Tornionlaksosta.
Se oon vaikkeet aijat, vähän ruokkaa ja rahhaa, ja 18-vuođen ikhäinen Brita Salomonsdatter oon lähätetty Alattion kautta täđin tykö Målsneshiin.
Tämä oon lähtökohta avioparin Ragnhild Nilsenin ja Egil Børge Mikalsenin uuđele norjan kieliselle kirjale «Fra Tornedalen til Havlandet».
Kirja muistelee Nilsenin isoisoisoäiti Britan reisun ympäri Målsneshiin, ja hänen elämästä Keski-Tromssassa.
– Se oon dokumenttirommaani joka oon siđottu oikkeissiin tapattumhiin, henkhiin ja aijankohthiin. Dialogit ja keskustelut met olema luonheet niin ette net saattais olla tapahtunnu.
Dramaattinen elämä
Nilsenin jälkhiin oon aviopari käyttäny paljon aikkaa Britan elämän tutkimuksheen.
Het oon muun muassa käyny läpi usheita kirkkokirjoi, ollu yhtheyđessä ihmishiin jokka tekkee sukututkimusta ja jopa käyny Tornionlaksossa.
– Met olima esimerkiksi Haaparannassa kattomassa plassii missä met uskoma Britan olheen pois. Met olema työtely kovasti tutkimuksen kans, muistelee Nilsen.
Perethistoriikki ja erilaiset dokumentit näytethään ette ko Brita saapui Målsneshiin, alkkoi hän työtelä palveluspiikana paljon vanhemalle kauppihaale Fredrik Konrad Hansenile.
Het pääđythiin naimishiin ja sai lopulta viisi lasta. Mutta joittenki hyvviin vuoshiin jälkhiin kotivaimona muuttui Britan elämä kuitenki dramaattisesti.
– Isoäiti pruukkas muistela ette niin Britan mies ette viiđen vuođen ikhäinen lapsi hukuthiin jokheen.
– Mutta ko met aloima tutkiit tappausta, saathiin met selvile ette se oli tyhä lapsi joka hukkui. Mies otti oman hengen surun takia.
Se oon kuitenki vaan alku Britan dramaattisele elämälle. Kirjailiijat ei halluu paljastaat liian paljon, mutta mainithaan sanat «synnytysalakulo» ja Rønvikin hulluintalo.
– Hänen elämä ei koskhaan muuttunu normaaliksi sen jälkhiin, sannoo Nilsen ja anttaa yhđen tärkkeen neuvon lukijalle.
– Älä luje kahta vikkaa setninkkii ennen ko sie oot valmis koko kirjan kans.
– Hyvin kirjoitettu rommaani
– Met olema tođela ylppeitä ette met saima anttaat tämän kirjan ulos. Se oon tođela hyvin kirjoitettu ja jännittäävä rommaani, jonka etheen oon tehty paljon tutkimusta.
Sen sannoo Erlend Skjetne, Ruijan Forlagin johtaaja, joka oon antanu «Fra Tornedalen til Havlandet» ulos.
– Se oon kans tärkkee kirja joka anttaa selvälä ja jännittäävällä tavala kunka joukkovajelus Pohjais-Suomesta Ruijhaan oli, sannoo hän.
– Surulinen historiikki joka oon hyvin kirjotettu.
Hän saattaa anbefaalata kirjaa kaikile joila oon intressi kväänin historiikkii kohthaan.
– Mie uskon ette kaikki joila oon semmonen intressi tulhaan tykkäämhään tästä kirjasta.
Anbefaalaa kaikile
Kirjailiijat saattaa itte anbefaalata kirjaa kaikile. Mutta varsinki niile joila oon kväänin juurii tahi niile jokka haluthaan tiettäät lissää kväänin historiikin ympäri.
Lisäksi Britan historiikki tuo Keski-Tromssan kväänin historiikkii paremin esile.
– Se oon vieläki ussee joka ei vielä tieđä kekkä kväänit oon. Met ajattelema ette se oon tärkkeetä saađa tämä historiikki kirjoitettu ylös.