Kvääninuorten kunniapalkinto mennee tänä vuona kväänin kickbokser Kristin Vollstadile joka oon pois Hansinkentältä Raisin kommuunilta.
– Mie oon tođela iloinen ette mie saan tämän palkinon. Se oon fiini palkinto, kirjoittaa Vollstad e-postissa NRK:le.
- Aijemin tänä vuona Vollstad nomineerathiin palkinon saajaksi Sporttigaalassa.
Hän sannoo ette se oon mukavaa ette hänen oon huomattu.
– Mie olen tođela ylppee minun kvääniin juuriin ympäri.
Kickbokseri toivoo ette usheempi nuori tutkis ja pitäis huolta heiđän yhtheisestä kulttuurista ja historiikista.
Kickbokseri Kristin Vollstad.
Foto: Landslaget i Kickboxing (NKBF)Jakkaa palkinon kolmanen kerran
Se oon kolmas kerta ko nuorisojärjestö jakkaa palkinon. Se jajethaan joka vuosi hengele jonka engasementti oon meinanu paljon nuorile kvääniile.
Heiđän perustelussa seissoo ette het haluthaan kunnioittaa häntä, ei tyhä hänen sporttimenestyksen takia, mutta kans sen takia mitä hän tekkee kvääniin etheen.
– Kristin Vollstad oon hänen sporttivaattheila, joissa seissoo vaimovoima, tuonu esile sitä ylppeyttä mitä ihminen saattaa kokkee ommiin juurhiin ympäri.
Styyri kirjoittaa ette hän oon esikuva koko kväänin liikkheele.
– Se ei ole epänormaali näky nähđä hänen feiraamassa voittoo kvääniflakun kans, seissoo se perusteluissa.
Styyri toivoo onnee Vollstadile, ja toivoo ette hän jatkaa kväänin sisun ja inspirasuunin levittämistä.
Feiraa päivää
Lauvantaina kväänikansan päivänä tullee Vollstad olemhaan Norjan Kickboxing Liiton kokhoonpanossa.
- Met tulema feiraamhaan päivää keksuila, kaffila ja flakuila, kirjoittaa hän.
Seuraava kilppailu oon jo ensi viikola. Hän reissaa Italihaan Kickboxingin Mailman Cuphiin.
