Feiraa kväänin kielipäivää antamalla ulos kaksi uutta animasuunifilmii

– Toivottavasti filmit oon isoile ja pienile inspirasuunin kalttiit kväänin kielen oppimisessa, kirjoittaa Anna-Kaisa Räisänen pressemellingissä.

Hän oon faakivastaava Kainun instituttila joka tääpänä oon antanu ulos kaksi uutta kväänin kielistä animasuunifilmii lapsile.

Niin Kissa oli yksin ulkkoo ette Jalopeura ja hiiri oon lyhykäissii filmii joitten moolina oon opettaa lapsile kväänin sannoi ja fraassii.

Ensimäisenä mainittu oon esimerkiksi Karin Larsenin kirjoittama reekeli, joka auttaa oppimhaan elläimiitten ja eläviitten nimet kvääniksi.

– Toistaminen, soma teksti ja fiinit kuvat auttaavat lapsii muistamhaan sanat, seissoo se pressemellingissä.

• Vuona 2021 antoi Anna-Kaisa Räisänen itte ulos uuden kväänin kielisen lastenkirjan. Se oli osa Linus-sarjaa.

Osa isompaa tarjousta

Räisäsen jälkhiin oon uuđet filmit osa niitä opetusmateriaaliita joita institutti tekkee heiđän omale opetusresursinettisaitile kvensk.no.

Sieltä opettaajat, koululaiset ja muut jokka oon haluthaan oppiit kieltä saatetthaan löyttäät opetusmateriaalii erilaisista teemoista jokka saatethaan passata erilaishiin opetussituasuunhiin.

Nettisaitin jatkokehitys alkkoi vuona 2018, ja oon yhä kesken, kirjoittaa Räisänen.

– Mutta jo nyt sie saatat mennä nettisaitile ja hakkee inspirasuuni opetuksheen ja omhaan oppimisheen.

• Kans Koulutus direktoraatti oon tekemässä uussii digitaalissii opetusresurssii. – Moolina oon anttaa niin hyvä tarjous ko tyhä mahđolista.

Toinen animasuunifilmi oon käänetty kvääniksi Æsopin faabelin pohjalta. Historiikissa jalopeura ja hiiri muistellee kunka tärkkeetä oon ette met emmä halveksu pienemppii.

«Tämän faabelin avula lapset oppiivat tarjoomhaan appuu toisile ja kiittämhään avusta. Tekstissä oon monet verbit jokka kuvvaavat liikkumista ja tuntemista.»