– Atle Antonsen trekkjer seg frå ny sesong av «Kongen befaler», og ein nyinnspelt julespesial av programmet vil ikkje bli sendt som planlagt.
Det skriv kommunikasjonssjef i Warner Bros. Discovery Hanne McBride i ein e-post til NRK.
Ho legg også til at Antonsen har vore open om at han ønskjer å ta nokre nødvendige rundar med seg sjølv.
– Vi er samde om at det ikkje er rett at han samtidig er på jobb for oss.
NRK har vore i kontakt med advokaten til Antonsen, Marianne Klausen, som seier at han har ingen kommentar til saka.
Sumaya Jirde Ali (24) meldte Antonsen til politiet etter at han på ein bar skal ha sagt at ho var «for mørkhuda» til å vere der. Fredag kom nyheita om at saka vart lagt bort på grunn av manglande bevis.
«Kongen befaler» er eit humorprogram som går på TVNorge og Discovery +. Der har Antonsen rolla som kongen og i kvart program gir han deltakarane rare praktiske oppgåver og utfordringar.
No startar Discovery jobben med å finne ny programleiar, ifølge McBride.
Ikkje tilhengjarar av å kansellere innhald
McBride skriv også at Antonsen vil likevel vere å sjå på kanalane framover.
Han har spelt roller i tidlegare sende julekalendrar som ligg på Discovery+ og som skal sendast på TVNorge i desember.
Dette gjeld program som Espen Eckbo sin «Nissene over skog og hei», «Nissene i bingen» og «Nissene på låven», kor Antonsen spelar karakteren Bent Leikvoll.
Atle Antonsen (til venstre) var med i julekalenderen «Nissene i Bingen» som vart sendt på TVNorge i fjor.
Foto: Discovery– Dette er populære julekalendrar, der Atle i kvar av dei har spelt éin av veldig mange karakterar. Vi meiner desse kalendrane skal kunne vere ein del av juletradisjonen for dei sjåarane som ønskjer det, skriv ho og legg til:
– Samtidig har vi forståing for at det for mange vil vere umogleg å kose seg med dei på same måte i år som i fjor.
McBride seier at dei på eit generelt grunnlag ikkje er tilhengjarar av å kansellere innhald.
– Det skal vere rom for tilgiving av folk som har gjort feil og bede om unnskyldning. Samstundes er tillita til publikum avgjerande for opplevinga av det dei blir serverte. Det er kanskje det viktigaste omsynet vi som kringkastar må ta, seier McBride.
Kommunikasjonssjef i Warner Bros. Discovery Hanne McBride
Foto: Erik Johansen / NTB– Eg veit kva for verdiar eg står for
Onsdag publiserte samfunnsdebattanten og forfattaren Sumaya Jirde Ali eit innlegg på Facebook om ein episode ho politimelde Antonsen for.
Ali skreiv i innlegget at Antonsen skreik at ho skulle halde kjeft og sa «du er for mørk til å vere her», fleire gongar.
Hendinga skjedde på utestaden Bar Boca i Oslo for få veker sidan. Komikaren vart meld for hatefulle ytringar og omsynslaus åtferd.
Dagen etter at Ali publiserte innlegget, la Antonsen ut ei unnskyldning på Facebook.
– Eg veit kva verdiar eg har, og kva eg står for. Eg har aldri tenkt at det kan vere mogleg for meg å vere rasistisk. Men etter denne kvelden og desse idiotiske kommentarane skjønner eg at eg må gå nokon rundar med meg sjølv, skreiv Antonsen.
På fredag vart saka lagt bort. Statsadvokaten meiner at ytringa til Atle Antonsen ikkje er kvalifisert krenkjande i den samanhengen den vart sett fram.
