Gyda (14) gjer seg klar for jegerprøva – nasjonalt er det lange ventelister på kurs

I år er det mange som står i kø for jegerprøvekurs. Helga før den femtende bursdagen hennar, er Gyda Glesaaen Johansen ei av dei heldige som får opplæring. Etter ho har stått, har ho planane klare.

– Eg skal byrje med småvilt, også tenker eg å bli med på større dyr når eg blir meir erfaren. Ein gong kan eg kanskje gå på reinsjakt, seier ho.

Gyda er ikkje åleine i interessa i villrein. I år har Statskog 93 tilbod på rein, totalt 119 dyr, men dei har fått inn 2375 søknadar.

Eksklusiv jakt

Statskog sine søkartal på villrein er 25 gonger større enn tilbodet. Det er ein oppgang på 400 søkarar frå i fjor.

– Det blir litt bingo om du får jaktkort, seier Kristian Eiken Olsen.

Han er konsulent i Statskog for jakt og fiske, og har sjølv jakta på villrein. Det er ikkje for kven som helst.

– Du går ofte åleine, over lange strekningar, og må bere tungt attende. Samstundes er det eit eksklusivt dyr. Den einaste ville fjellreinen som er att i Europa er i Noreg.

• Har du lest denne? Vi treng ikkje lenger å jakte for mat, men det kan vere ein del av ein berekraftig diett.

  

Auka interesse

Men det er ikkje berre villreinjakt som har ein oppsving i søkarar. Noregs jeger og fiskarforbund har 6000 fleire medlemmar i år enn i fjor. Leiaren i NJFF, Knut Arne Gjems, trur det har samanheng med ei auka friluftsinteresse.

– Folk har fått med seg at naturen er koronavenleg, og det gjeld også jakt. Vi har no lange ventelister på kursa våre for jegerprøva.

Småviltjakt har også ein god oppgang, noko han tenker er naturleg, sidan det er ein lågare terskel for dei som er heilt ferske å byrje med slik jakt.

– I tillegg er det færre som reiser over grensa til Sverige for å til dømes jakte på fugl.

Viktig med forvalting

Torgeir Lande, rådgjevar for jakt, fiske og friluftsliv i fjellstyresambandet, er glad for at nye folk får opp auga for jakt.

– Det er kjempefint at folk kjem seg ut i naturen. All jakt i Noreg er basert på overskot av dyr, og det trengst jegerar som kan ta dei dyra. Villreinen i Rondane og mot Dovre har hatt gode kår, og då må vi halde den ved like.

Fjellstyra i tidlegare Oppland har ikkje hatt like stor oppgang i søkarar til villreinjakt som Statskog, men med 3601 søkarar frå utanbygds på 292 tilbod for 2021, er det nok jegerar å ta av.

Det er ikkje alle stader i Noreg reinen har hatt like gode kår. Les meir om skrantesjuka som har ramma hjortedyr på Hardangervidda.

Tek vidare tradisjonen

Gyda er einig i at jakt gir gode naturopplevingar.

– Det er noko anna enn når ein går ein søndagstur. Eg har gått litt på jakt med far min etter smådyr som skarv og rev og slikt. Det er artig å oppleve dyr på nært hald.

Ho framhevar også den sosiale delen av jakt, og noko av interessa hennar kjem av at det står sterkt i familien hennar.

– Både bestefar og far min jaktar, også har bror og syster mi jakta litt.