Øygard blei i 2012 dømt i høgsterett til fengsel for gjentatte overgrep mot ei tenåringsjente, og i mars 2021 ba han om gjenopptaking.
I oppmodinga argumenterte den tidlegare Ap-ordføraren for at tekstmeldingane mellom han og den fornærma kunne vere fabrikkerte.
Avgjersla kom den 16. november, og Gjenopptakelseskommisjonen avgjorde at saka ikkje skal takast opp igjen.
NRK har vore i kontakt med Øygard som viser til advokat John Christian Elden for kommentar.
Elden skriv i ein e-post til NRK at klienten «sjølvsagt er svært skuffa» over avgjersla.
– Han noterer at denne saka er avgjort av leiar av kommisjonen aleine, og er overraska over at ho nekta kommisjonen å vurdere ei så samansett sak, skriv Elden.
Fekk fire år fengsel
Rune Øygard blei vald til ordførar i Vågå kommune i Nord-Gudbrandsdalen for første gong i 1995. Deretter blei han vald på ny ved kvart kommuneval fram til 2011.
Øygard fekk permisjon frå ordførarvervet i 2012 då han blei tiltalt i overgrepssaka.
Øygard blei dømt til fire år fengsel.
Vil sende ny oppmoding
I klagen, som no er avvist, har Elden argumentert for at dommen mot Øygard er uriktig.
Elden skal ha skrive i klagen at det finst gode grunnar til å anta at jenta, som Øygard er dømt for å ha forgripe seg på, har forklart seg bevisst uriktig.
Elden skriv no til NRK at Øygard vil sende inn ei ny oppmoding for behandling av ein samla Gjenopptakelseskommisjon, for ei fullstendig vurdering av saka.
