Selde ut første månaden på fire minutt

I ein bergvegg i Gudbrandsdalen blir det reist ein av dei mest unike overnattingsstadane i landet: Ei svevande hotellsuite med to senger for dei som er ute etter ei spesiell oppleving.

Og dei er det mange av. Om ein månad opnar sambuarparet Ingrid Tho og Geir Lyftingsmo dørene til dei fyrste betalande gjestane.

Den første månaden vart utseld på fire minutt.

– Vi trudde det knapt sjølve. Vi hadde håpa på nokre bestillingar da vi opna, men det berre eksploderte, seier initiativtakar Ingrid Tho.

Det er dyrt å bygge høgstandard overnatting på ein fjelltopp, og det er dyrt å leige. Men det ser ikkje ut til at nordmenn let seg skremme av ein døgnpris på rundt 5000,-.

– Det er dyrt, men det er verdt opplevinga. Vi får ikkje negative attendemeldingar på prisen, og vi har lagt oss i same leia som dei vi kan samanlikne oss med, seier reiselivsgründeren.

Nordmenn likar seg til fjells, men burde seterdrift inn på UNESCO-liste?

Vill vekst i koronatida

Allereie da Eagle Nest Eco Lodge var på teiknebrettet, fekk det plass i boka 110 unike overnattingar i Noreg.

Forfattar av boka, Torild Moland, er ikkje overraska over etterspørselen.

– Døgnprisen på dette tilbodet ligg heilt klart i øvre sjiktet, men vi ser at folk gjerne betaler for ei behageleg og konsentrert naturoppleving, seier Moland.

Forfattaren har besøkt over hundre av dei unike overnattingsstadene i boka, og ho ser mange fellestrekk.

– Først og fremst naturen, at ein får ei storslått naturoppleving, utan at ein treng å vera Lars Monsen, seier Moland.

I tillegg er dei fleste privateigde og starta av entusiastar med ektefølt kjærleik til eige område, ein kjærleik dei har lyst til å dele med andre.

Torild meiner det er fleire faktorar som gjer at etterspurnaden har tatt av i koronatida. Mellom anna fordi dei er små, ligg avsides og gjev oss ei trygg og koronavenleg oppleving.

– Det er ein kraftig etterspørsel. Nokre har meir suksess enn andre, men dei som set i gang sel ut sengene med ein gong. Det er heilt ekstremt, seier Moland.

Ser etter nyheitsverdi

Sambuarparet bak Eagle Nest Eco Lodge har fått litt over 1,2 millionar i støtte frå Innovasjon Noreg og 100 000 frå Sel kommune. Heile prosjektet er kostnadsrekna til 2.6 millionar.

Kaja Van Den Berg frå Innovasjon Noreg seier dei ofte vel prosjekt som skil seg ut.

– Vi ser etter nyheitsverdi. At det representerer noko nytt og har noko unikt ved seg. Og dette er eit prosjekt som leverer spot on på det vi ser av reiselivstrendar, seier Kaja Van Den Berg.

Ho fortel at Innovasjon Noreg i Innlandet har innvilga 43 prosent fleire saker i 2020 enn året før. Og dobla nesten beløpet som var løyvd til reiseliv. Det er delvis på grunn av pandemien.

Det lønnar seg å vere kreativ. Desse fann ein ny leveveg det siste året:

Fersk trend

Noreg kom seint på banen med å bygge unike overnattingsstader, men nå har vi tatt igjen til gagns, seier Moland.

– Dei siste åra har det vorte så mange at sjølv eg er i ferd med å miste overblikket, seier forfattaren.

Moland trur at utfordringa i framtida blir å skilje seg ut i mengda av unike tilbod.