Dei vil endre grønsakproduksjonen

– Me gjer dette heilt innandørs, me kan gjere det utan jord, og så brukar me led-lys i staden for sollys, seier Jo Andre Flåseth.

Martin Molenaar (26) frå Bærum og Jo Andre Flåseth (24) frå Skarnes viser ivrig fram oppfinninga deira. Eit hyllesystem med automatisk vatning og justering av lys skal gjere mogleg for grønsakprodusentar å dyrke grønsaker innandørs, heile året.

– Produksjon av grønsaker kan føregå på denne måten i framtida, seier Martin Molenaar.

Lagar oppskrift på heilautomatisk dyrking

Prosjektet har dei to elektroingeniørane i Avisomo AS drive med i to år, og i 2019 fekk selskapet deira heile 763 420 kroner i støtte frå Grønn framtid i Oppland fylkeskommune.

Medan dei to leitar etter investorar har dei fått vidareutvikle og teste systemet i den nedlagde bilverkstaden til grønsakprodusent Per Odd Gjestvang på Skreia i Østre Toten.

I denne runda har dei to produsert 12 000 spisskålplanter som skal ut i åkeren.

Med å til dømes regulere lys og fukt, kan dei kontrollere kor høge plantene blir, kor mykje røter dei får, og kva farge dei får. Når dei har funne den optimale oppskrifta for til dømes spisskålen, kan dyrkinga bli heilautomatisk.

– Me prøver å minimere arbeidskrafta så mykje som mogleg, med full automasjon der alt går av seg sjølv. Du set det berre inn, trykker play, og så er det ferdig om fire veker, seier Jo Andre.

Framover vil dei to lage oppskrifter på korleis forskjellige planter skal dyrkast fram, slik at alt kan gå automatisk, frå spire til ferdig grønsak.

– I framtida vil me definitivt klare å dyrke alle grønsaker på denne måten, seier Martin.

Nøgd med plantene

Når grønsakprodusent Per Odd Gjestvang skal sette spisskålspirene ut i åkeren, seier han dei er meir kompakte enn vanleg.

Han meiner systemet er relevant for andre produksjonar også, og seier systemet er bra fordi det treng til dømes mindre varme, og dermed sparer energi samanlikna med å dyrke fram planter i veksthus.

– Konseptet er interessant fordi det er modulbasert. Du kan byrje lite og skalere opp. Det dannar grunnlag for automatisering, seier Gjestvang.

I første omgang ynskjer utviklarane i Avisomo AS å lage systemet klart for grønsakprodusentar, men dei ynskjer også å utvikle mindre system som kan brukast i kantiner, sjukeheimar, burettslag og i privatbustader.

Gjestvang er ikkje redd for at eit slikt system skal kunne utkonkurrere bøndene.

– Dette er innovasjon, nyutvikling, og det vil betre produksjonen på alle måtar. Det har skjedd ein revolusjon i landbruket, og dette her er sikkert ein ny revolusjon som kjem, seier Gjestvang.

Kan vere aktuelt for hotell

I hotellbransjen har fleire alt prøvd grønsaksdyrking. Thon hotels har til dømes eitt hotell med grønsakhage der alt skjer manuelt, og dei har også hotell med vekstkabinett med automatisk vatning og lys.

Konserndirektør Morten Thorvaldsen for hotell og restaurantgruppa i Olav Thon Gruppen seier eit system som dei to ingeniørane utviklar ikkje er utelukka.

– Me er alltid interesserte i å tileigne oss ny kunnskap og utvikling, og om det kan vere aktuelt kjem an på fleire faktorar og må vurderast i kvart enkelt tilfelle, seier Thorvaldsen.

Også Scandic hotels dyrka eigne grønsaker og urter, der nokre hotell har brukt eigne dyrkeskap for urter. Om eit system som det Avisomo AS utviklar er aktuelt er vanskeleg å svare på for fungerande F&B-direktør Morten Malting i Scandic Norge.

– Akkurat no fokuserer Scandic på å handtere koronasituasjonen, og me må halde kostnadene nede for å berge arbeidsplassar. Me er derimot levande opptatt av å ta vare på miljøet, og er positive til nyvinningar som kan redusere miljøavtrykket, seier Malting.

• LES OGSÅ: – Hvorfor dyrker vi ikke mat i parkene våre?
• LES OGSÅ: Dyrk din egen mat
• LES OGSÅ: Flytta hagen opp på taket