Det har lenge vore planar om å bygge eit nytt stort felles sjukehus for gamle Hedmark og gamle Oppland ved Mjøsbrua.
Ei prosjektgruppe har laga planane som styringsgruppa i Helse sør-øst skal vurdere og vedta fredag.
Ifølge Gudbrandsdølen Dagningen og Hamar Arbeiderblad kjem det nye Mjøssjukehuset til å hamne i Brumunddal.
Dette har ikkje NRK fått bekrefta.
Helse sør-øst skal ha pressekonferanse fredag på Hamar, der dei presenterer planane.
- Les også:
Lillehammer og Gjøvik får ha sjukehus
Lillehammer får truleg ha akuttsjukehus og Gjøvik skal ha eit sjukehus for planlagde operasjonar.
I planane ligg det også at to av dei fire sjukehus i fylket blir lagt ned. Ifølge dei to avisene er det snakk om sjukehuset på Hamar og i Elverum.
I tillegg skal dei legge ned to psykiatriske sjukehus, Reinsvoll på Toten og Sanderud utanfor Hamar. Desse tenestene skal truleg også inn i det store nye Mjøssjukehuset.
GD erfarer at sjukehusstrukturen i Innlandet blir slik:
- Mjøssjukehuset hamnar i Brumunddal.
- Akuttsjukehus blir i Lillehammer.
- Gjøvik får sjukehus for planlagde behandlingar.
- Akuttsjukehus på Tynset.
- Lokalmedisinske senter på Otta og Fagernes og Hadeland.
- Luftambulanse på Dombås held fram som før.
- Ny base for luftambulanse i Elverum.
- Sjukehusa i Elverum og Hamar leggjast ned.
- Reinsvoll og Sanderud leggjast ned.
Sjukehuset i Kongsvinger er ein del av A-hus og er ikkje med i rekninga.
– Utfordrar semja
Ordførar i Gjøvik, Torvild Sveen, seier til NRK at han er svært overraska over at prosjektgruppa kjem med eit framlegg som etter hans meining utfordrar den tidlegare semja om eit sjukehus ved Mjøsbrua.
– Det kan verke som det ikkje er mangel på pengar i norsk sjukehusvesen. Sjukehuset på Gjøvik har bra bygningsmasse, vi har eit kompetansemiljø på NTNU som kunne rekruttert fleire til området. Vi har også det største opptaksområdet når det gjeld befolkning.
Han meiner også at befolkninga på Hadeland og sørlege delar av Valdres vil velja andre sjukehus, og at Sjukehuset Innlandet difor vil tape pengar.
Blir offentleggjort fredag
Det er ei prosjektgruppe som har jobba fram forslaget. Styringsgruppa i Helse sør-øst skal vedta forslaget fredag. Dei planlegg å offentleggjere dette på ei pressekonferanse fredag klokka 15.
Så blir planane sendt til styret i Sjukehuset Innlandet.
Helse sør-øst sitt styre gjer det endelege vedtaket 4. februar neste år. Så kjem saka på helseministeren sitt bord.