– Heilt urimeleg at elevane må ta att pensum sjølve

Når 5500 lærarar i heile landet blir tatt ut i streik frå måndag, vil elevane deira gå glipp av undervisning i deler av kompetansemåla. Det elevane går glipp av, må dei sjølve ta att.

LES OGSÅ: – Må ta att det dei mister sjølve - Hordaland

– Eg kjenner eg blir uroa. Dette er eit altfor stort ansvar for elevar og foreldre, seier Margareth Yttredal, FAU-leiar på Møhlenpris skole i Bergen.

– Eg tenker me ikkje kan godta at det er vårt ansvar. Då må ein gjere noko med eksamen og eventuelt ta bort noko frå den. Det må få konsekvensar for korleis eksamen blir utarbeida.

– Ikkje alle kan hjelpe ungane sine

Eksamen er felles for heile landet, seier Fylkesdirektør for opplæring i Hordaland, Svein Heggheim.

– Om eksamen skal endrast er det ei vurdering myndigheitene må gjere sentralt.

Ytterdal som sjølv er lærar, men som ikkje er tatt ut i streik, meiner dette vil gå ut over elevane. Ikkje alle har moglegheiter til å hjelpe ungane sine med å ta att det dei mister, meiner ho.

– Det er store skilnadar på folk. For mange er det vanskeleg å ha eit fagleg ansvar for å ta att det som er tapt.

– Dette vil gå ut over elevane. Spesielt på ungdomsskulen i avgangsfaga. Dei har det travelt nok som det er.

Kjem på bana dersom streiken blir langvarig

– At foreldra blir meir opptatt av dette ved skulestart, forstår eg, seier Kommunaldirektør for skule i Bergen kommune Anne Marit Prestrerud.

Ho har endå ikkje noko klart svar til dei som vil undervise barna sine sjølve, og skaffe seg oversikt over planar og lærebøker.

– Dersom det skulle bli ein langvarig streik, vil me som kommune gå inn og sjå på dette.

FAU-leiaren seier dei som foreldre får forsøke å gjere det beste ut av situasjonen.

– Me må jo følgje den planen som lærarane har sett opp før ferien. Så får me gjere så godt me kan heime.

LES OGSÅ: Desse skulane blir tatt ut i streik - Hordaland