Ein 18 år gamal mann mista livet i ulukka på Husnes i Kvinnherad i romjula i fjor. Ein jamaldra mann vart hardt skadd.
Ulukka sette eit sterkt preg på ungdomsmiljøet i Sunnhordlands-kommunen.
Trefte autovernet på verst tenkelege stad
Ulukkesanalysegruppa i Statens vegvesen har no levert granskingsrapporten etter dødsulukka natt til 27. desember i fjor.
I ein slak venstresving i Opsangervegen fekk 18-åringen bak rattet skrens på bilen. Bakenden slo ut mot høgre og bilen trefte deretter autovernet i motsett køyrefelt.
Akkurat på denne staden var det ein opning i autovernet, noko som til slutt fekk fatale følgjer (sjå figur).
«Bilen dreier noe, og går sidelengs inn i autovern-avslutningen på andre side av åpningen», vert det skildra i rapporten NRK har fått innsyn i.
Den omkomne var passasjer i bilen og sat difor på sida som trefte autovernet først. Sjåføren vart funnen kritisk skadd i baksetet på bilen.
– I denne ulukka avviste ikkje rekkverket bilen, slik det skal, seier Terje Vidar Hoel, seniorrådgjevar i Statens vegvesen.
Oppfyller ikkje dagens krav
I rapporten blir fire punkt trekt fram som særleg kritiske for at ulukka skjedde:
- For høg fart forholda tatt i betraktning
- Is/slaps i vegbana
- Fleire opningar i autovernet på strekninga
- Autovernet hadde feil avslutning (ikkje godkjent etter dagens standardar)
«Dersom minst en av disse hendelsene ikke hadde inntruffet, kunne ulykkes- og skadeforløpet vært brutt», slår ulukkesanalysegruppa fast.
– Rekkverket på staden var ikkje i samsvar med dagens standard. Denne type avslutningar fører til ekstra skader på køyretøy, seier Hans Olav Hellesøe, leiar for ulukkesanalysegruppa i Statens vegvesen vest.
Trur «støytputer» kunne ha redda liv
Etter vegvesenet si handbok for rekkverk og andre tryggingstiltak (ekstern lenke) ville ein i dag ha utrusta endane med såkalla støytputer i begge retningar.
Dersom vegen hadde blitt bygd i dag, ville vegvesenet også ha avgrensa talet på opningar i autovernet. Rapporten slår fast at det var unødvendig mange.
Ein såkalla støtabsorberande endeavslutning, eller «boksehanske», er det anbefalte endestykket på autovern som blir bygd i dag. Den ville ha fanga opp ein del av energien frå bilen.
Hellesøe trur betre eigna rekkverkendar kunne ha gitt eit anna utfall då bilen segla inn mot rekkverket.
– Det er ikkje utenkeleg at det ville ha hindra det fatale utfallet.
Har skifta ut autovernet
Kvinnherad kommune, som er vegeigar, har etter dødskrasjen lukka opninga i autovernet på ulukkesstaden. I tillegg er to andre opningar på strekninga stengd igjen.
– Dette er eit eldre veganlegg, som blei bygd i tråd med det dåverande regelverket. Me jobbar kontinuerleg å lukka flest mogleg opningar som ikkje har eit føremål, seier einingsleiar for veg, Per Inge Naterstad.
Slikt autovern som var på ulukkesstaden er vanleg over store deler av landet.
– Det er diverre også ein del slike løysingar på riks- og fylkesvegnettet. Det var godkjende løysingar då dei vart bygde, men ein har lært litt undervegs. Slike løysingar blir ikkje bygde i dag, seier Hoel.