Stor auke i talet på familievernsaker: – Anstrengd økonomi kan vere éi årsak

– Vi ser ikkje bort frå at den anstrengde økonomien til folk kan vere ein del av årsaka.

Det fortel Kristin Tafjord Lærum, som er leiar for familievernkontora i Drammen og Kongsberg.

Kontora har ansvar for vel 180 000 innbyggjarar i søre og midtre Buskerud.

I fjor hadde kontora litt over 300 meklingssaker totalt. I år nærmar dei seg 500 saker, og året er enno ikkje omme.

Årsaka til den kraftige auken er dei ikkje heilt sikre på.

At økonomi er ei stor kjelde til konflikt i parforhold er ingen løyndom.

– Men vi klarer ikkje å slå fast noko heilt sikkert. Det blir berre spekulasjon til så lenge, seier Camilla Dønheim, fagleiar og psykologspesialist ved kontoret.

Lokalt fenomen

NRK har fått tilgang til statistikk for talet på nye meklingssaker på landsbasis frå Bufdir.

Sett totalt dei siste åra har talet på nye meklingssaker gått ned sidan 2018.

Det ser ut til at ein vil hamne på omtrent same tal som fjoråret på landsbasis.

Familievernkontoret i Asker og Bærum har omtrent 50 000 fleire innbyggjarar enn dekningsområdet til kontora i Drammen og Kongsberg. Dei ligg an til omtrent 20 prosent færre saker enn tidlegare år.

Så kvifor er auken så stor akkurat i Drammen og Kongsberg?

– Drammen er ein av kommunane med dei største sosioøkonomiske utfordringane i landet, og det synest særleg no. Når ein får eit sånt press inn i eit parforhold fører det ofte til konflikt, og i verste fall samlivsbrot, meiner Kristin Tafjord Lærum.

– Ta kontakt før det går gale

Lærum har jobba ved familievernkontoret Drammen-Kongsberg sidan 2015.

Sidan den gong har ho lagt merke til endringar i folks førespurnader.

– Det er meir alvorlege og kompliserte saker som folk treng hjelp med enn før, seier ho.

Men at auken kjem av for mykje tid saman under pandemien, er ikkje psykologspesialist Camilla Dønheim samd i.

– Tvert imot, vi har fått høyre av fleire par at dei har hatt godt av meir tid saman, meiner Dønheim.

Medan Lærum medgir at dei har måtta gjere prioriteringar blant dei som tek kontakt på grunn av pågangen.

Det er fyrst og fremst par med barn som blir prioriterte.

Helst skulle dei sett at færre enda opp med samlivsbrot.

– Vi skulle ønskje at par tok tidlegare kontakt med oss. Det kan fort gå fleire år med gnissingar før det til slutt skjer seg.

Kva teikn burde ein sjå etter for å skjønne at ein må gjere noko?

– Eit visst nivå av konflikt er bra for parforholdet. Men viss ein hamnar i dei same konfliktane kvar gong, burde varselslampane blinke, avsluttar Lærum.