Det har kome sterke reaksjonar etter at Utstranda vel flytta steinen som vart ein spontan minnestad etter terroren på Utøya 22. juli 2011. Velforeininga ønska ikkje lenger at folk nytta ein vegkant med utsyn mot Utøya til å leggje ned blomster og tenne ljos. Dei køyrde steinen, med blomster og helsingar til ein rasteplass ved E16.
Allereie tatt i bruk
Torsdag kveld var nye, friske roser lagt ned på steinen der den står no. Styremedlem Ole Morten Jensen i velforeininga som bestemte seg for flytte heile minnesmerket bort frå privat grunn, seier naboane ikkje orka fleire grupper med turistar og interesserte som stansa ved steinen der den låg.
– Vi føler at vi har tatt liva våre tilbake. Vi orkar ikkje lenger å ha det slik det var, det passar ikkje å ha ein minnestad midt oppe i eit bustadfelt.
– Du synest ikkje at de har tatt dykk til rette på ein ufin måte?
– Nei, vi føler ikkje at vi har tatt oss til rette, eigentleg. Dette er privat grunn og vi har gjort det i samråd med grunneigar, seier Jensen.
AUF seier folk gjerne må nytte bryggja
Leiar for AUF, Eksil Pedersen, som sjølv overlevde terrorhandlingane, la ut melding på sosiale medium i går om at folk gjerne måtte legge att helsingar og tenne ljos på bryggja, kor organisasjonens ferje legg til kai ved Utøya.
– Det er mange som har behov for å minnast det som skjedde og leggje ned blomster. Og det har vore fint å køyre forbi og sjå at folk framleis, etter tre år, legg att helsingar ved vegen. Vi har vore opptekne av at vi får på plass ein varig minnestad, og håper at prosessen no blir betre, seier Pedersen.
Pedersen ønsker at folk bruker kaia til minnestad fram til ei varig løysing er på plass.
– Det er fint om de vil bruke den staden til å minnast det som skjedde.
Og no har altså dei som ønsker å leggje att bamsar, ord eller blomster fleire stader å gjere det. Utan at ein varig minnestad er på plass.