Mindre is i Arktis fører til at nye havområde opnar seg for skipstrafikk. Det er venta meir trafikk både i Nordaust- og Nordvestpassasjen i åra framover.
Men etter kvart som det islagde området også i det sentrale Polhavet krympar, vil det bli mogeleg å krysse tvers over Polhavet, for eksempel mellom Noreg og Beringstredet, med skip.
Tvers over Polhavet
Den amerikanske marinen førebur seg no på ei framtid med langt mindre is i Arktis. Admiral Jonathan White leier dette arbeidet.
- Les også: Slik kan framtidens skipstrafikk se ut
- Ser du på sjørutene i Arktis, er ruta tvers over Polhavet, forbi Nordpolen, heilt opplagt den raskaste. Våre berekningar viser at mellom 2020 og 2030 vil det kunne vere mogeleg å krysse dette havområdet i nærleiken av Nordpolen, seier White i NRK-programmet "Lille Norge og stormaktene".
Vekst på Svalbard
- Etter kvart som det blir meir og meir skipstrafikk her, vil denne ruta opne opp for ei betydeleg utvikling, seier han. Eg er heilt overbevist om at den transpolare ruta, tvers over Polhavet, kjem til å bli brukt i framtida.
- Sjå også: Urix om Arktis
- Kva vil dette få å seie for Noreg?
- Vi kan samanlikne med det vi ser for eksempel her i USA når det blir bygd ein motorveg over prærien - då blir det gjerne etablert bensinstasjonar, restaurantar, hotell osv. langs vegen.
- På same måte kan vi sjå for oss auka aktivitet på Svalbard og langs norskekysten som følgje av meir skipstrafikk i Arktis. Eg tenkjer ikkje då på turisme først og fremst, men ulike former for infrastruktur, seier han.
- Eg trur Noreg både bør og vil førebu seg på ei slik framtid, seier Jonathan White.
Førebels er det få skip som vel dei nordlege sjørutene, samanlikna med til dømes Suezkanalen. Men dette vil endre seg, trur White.
- Den amerikanske marinen ser for seg ei utvikling med meir aktivitet i desse områda, og større behov for infrastruktur. Vi må vere i stand til å operere på dette havet som på alle andre hav, seier han.
