– Vi låg under 1-0, og hadde i tillegg fått ein mann utvist borte mot Aberdeen. Likevel klarte vi å snu kampen og scora sigersmålet på overtid. Etterpå jubla Ronny Deila med knytta nevar saman med suppportarane. Fansen såg at dette var ekte følelsar og lidenskap. Då snudde det. Etterpå var han blitt populær blant fansen, seier leiaren av supporterklubben til Celtic i Norge, Harald Harsson.

Viser engasjement og glød

Med siger i dagens semifinale i ligacupen mot erkefienden Rangers vil vi få sjå nye scener med knytta never frå ein brølande nordmann.

Han hadde for vane å gjere det same framfor Strømsgodset-fansen på Marienlyst stadion i Drammen.

No viser han det same engasjementet, gløden og temperamentet rundt om på skotske stadionar.

39-åringen frå Porsgrunn er blitt trygg, sikker og varm i trøya etter ein trøblete start som manager i ein fotballgal by.

Første på tre år

For det kokar i Glasgow før Old Firm på nasjonalarenaen Hampen Park.

Det er det første oppgjeret mellom klubbane på tre år. Celtic mot Rangers er høgt oppe på lista over dei største og mest bråkete hatoppgjera i fotballen.

I 2012 blei Rangers degradert ned til nivå fire og satt under økonomisk administrasjon.

Klubben har kjempa seg opp til ein andreplass på nivå to.

Celtic er definitivt størst i byn, og Ronny Deila har fått sving på trenergjerninga i Skottlands hovudstad.

Klubben leiar serien med tre poeng føre Aberdeen, med ein kamp mindre spelt. I tillegg er klubben vidare i Europaligaen.

Fnys av sparken-utsagn

Likevel dukkar ordet "sparken" utruleg nok opp dersom Deila skulle leie laget sitt til nederlag i dag.

– Tapar han mot Rangers er han ferdig, skriv den tidlegare Celtic-angriparen John Hartson i si faste spalte i The Sun.

Også tidlegare Celtic-kollega Chris Sutton er kritisk.

– Ikkje gje meg alt det at Old Firm-kampar kan gå begge vegar. Eg vil ikkje høyre på det, seier Sutton og meiner skilnaden mellom laga er så stor at Celtic kan vinne med bind for augene.

Vil få fornya tillit

Men leiaren for supporteklubben ristar på hovudet av både Hartson og Sutton.

– Klubben tenkjer langsiktig og sparkar ikkje Deila med tap i dag, meiner Harald Harsson, som også trur at klubben fornyar den rullerande 1-årskontrakta med nordmannen.

– Det er ingenting som tyder på at klubben seier opp kontrakta. Eg trur han held fram neste sesong også.

– Deila har fått meir og meir tillit. Og sjølv om media og fansen var kritiske i starten, har han ein plan som verkar fornuftig. Spelemessig er vi blitt betre, problemet er at vi treng 15 sjansar for å score eitt mål. Spissane har ikkje levert, sjølv om John Guidetti var god i byrjinga, fortsetter Harsson.

Han er nervøs før dagens kamp.

– Det blir nok ein kamp der Celtic vil dominere ganske kraftig. Vi er nøydde til å levere varene for å vinne. For resultata frå FA-cupen i England viser at alt kan skje i slike oppgjer, seier Harald Harsson.