Letta Ulsrud: – Vi var ute av OL i ti minutt

• NRK følgjer OL direkte: Slik var curlingdramaet

Den norske skipen og lagkameratane sat på pinebenken i over 15 minutt etter at dei sjølv tapte 5-3 mot Danmark.

Med berre 5-4 i sigrar/tap var dei norske herrane heilt avhengige av at Kina slo Storbritannia. Då Noreg sin kamp var ferdig stod det 5-5 halvvegs ute i siste omgang. Kina hadde sistestein.

Å følgje dei siste steinane der blei nær sjølvpining, fortel dei norske herrane.

«Den er laus, den er kjempelaus!»

– Det var verst då kinesaren skulle sette sistesteinen. Han måtte legge den i midten, fortel Ulsrud til NRK.

Før sistestein låg Storbritannia inne med dei to beste steinane. Den kinesiske skipen måtte avslutte med ein velplassert sistestein.

– Så startar dei kinesiske gutta å koste med ein gang. Ut frå det vesle eg kan på kinesisk høyrer eg at dei ropar «den er laus, den er kjempelaus!». Dei nikkostar, og så går det akkurat. Det var ein herleg følelse, seier den norske skipen.

Eit formsterkt kinesisk lag er altså grunnen til at Noreg no framleis kan nå både semifinale og finale. Kinesarane vann til slutt 6-5, noko som gjer at Noreg møter Storbritannia i tie-break tysdag.

– Det er ein veldig rar følelse. Vi var ute av OL i ti minutt, før Kina plutseleg «edgar» Storbritannia og slår dei.

– Frå å vere ute til å vere inne, ein heilt sprø følelse. Eg kan ikkje beskrive det, fortel Ulsrud.

Tie-break-kampen mot Storbritannia går 06.00 norsk tid, klokka 09.00 i Sotsji.

Saka held fram under bildet.

Kan møte Sverige på ny

Dei norske herrane står med fem sigrar og fire tap, det same gjer Storbritannia. Kina og Canada står begge med sju sigrar og to tap, medan Sverige har spelt glimrande og har åtte sigrar og eitt tap.

Dersom dei norske herrane vinn, møter dei Sverige i semifinale. Den andre semifinalen går mellom Kina og Canada.

I grunnspelet tapte Noreg 5-4 mot naboen i aust.

Trøbla mot stjerna Stjerne

I Noreg sin siste kamp i grunnspelet var Danmark motstandar. Dei norske herrane var før OL favoritt i denne kampen, men etter varierande spel i dei føregåande åtte kampane var kampen open.

Noreg opna den første omgangen godt og heldt dei danske spelarane til 0-0 med dansk sistestein. I andre omgang gjekk Danmark opp til 0-1.

Noreg følgde opp med to sterke poeng til 2-1 i den tredje omgangen, før Danmark slo tilbake til 2-3.

Utover i kampen viste den danske skipen Rasmus Stjerne Hansen seg som råsterk. I uttak/dragningar låg den danske skipen på heile 98 prosent treffsikkerheit.

– For ein skip er dette heilt sjuke tal, seier NRK-ekspert Magnus Nedregotten.

Thomas Ulsrud låg på greie 83 prosent.

Missa i siste omgang

Noreg utlikna til 3-3 i den sjette omgangen, før det blei null poeng både i sjuande og åttande omgang.

I den niande omgangen hadde dei danske herrane sistestein. På tidspunktet låg Noreg best an, medan Danmark låg med nest beste stein.

Skip Stjerne Hansen sette derimot ein heilt perfekt stein. Han toucha den norske steinen så lett som det er mogleg, slo den like forbi den norske og la seg inn med bestestein. To poeng opp til 3-5 til Danmark.

Dermed måtte Noreg ha to poeng i den avsluttande omgangen, men Danmark forsvarte seg godt. Noreg tapte til slutt 5-3.

– Det kjennest ut som vi rundspelar dei heile kampen, men det er mogleg det ikkje er sånn. Skipen deira viste seg fram nokre nøkkelsteinar som gav danskane ein god posisjon, sa Christoffer Svae etter tapet.

– Vi slår Danmark åtte av ti gonger, og vi spelar knallbra. Så all «cred» til dei, for eg føler vi spelar ein veldig god match. Eg hadde litt uflaks på eit par av mine sistesteinar som plukka opp møkk på isen og skar ut. Danskane straffa oss hardt og slo oss, kommenterte skip Ulsrud.