Det er venta over 2500 bønder utanfor Stortinget tysdag. Frå Sørlandet vender tre fulle bussar med bønder nasen mot hovudstaden tidleg tysdag morgon.
Bondelagsleiar i Vest-Agder Birte Usland skal til Oslo.
Foto: Håkon Eliassen / NRK– Vi er kampklare. Det er fulle bussar, folk har stått opp nesten midt på natta og kjem ikkje heim att før midnatt. Det viser engasjement, seier leiar i Vest-Agder Bondelag Birte Usland til NRK.
- Les også: – Skal ikke legge møkkalass foran Stortinget
- Les også: Isfront og brudd i jordbruksoppgjøret
Skal gå i tog
Klokka 12.45 skal bøndene gå i tog frå Schweigaards gate i Oslo via Youngstorget, over Stortorget og opp Karl Johan til Stortinget.
I tillegg til særs mange bønder med traktorar, har bondeorganisasjonane invitert mange i miljørørsla og i organisasjonslivet, og fleire av desse er venta å halde appellar til støtte for bøndene.
– Det er veldig viktig å vise kva vi meiner til utspelet som regjeringa har komme med, seier bonde Martin Haugland frå Finsland i Songdalen.
- Les også: Bønder tapper butikker for øl
– Vil vise det norske folk
Han og Odd Harald Reve frå Lista er to av bøndene som reiser til Oslo for å demonstrere.
– No er eg blant dei i Vest-Agder som driv relativt stort, men det har ikkje så mykje å bety. Viss vi ikkje beheld dei store og små har vi ikkje noko landbruk i Agder. Vi blir stort ramma på den strukturen vi har i Vest-Agder, seier han.
– Viss vi ikkje har mangfald i landbruket vil ingen overleve. Viss vi hoggar småskogen dett dei store også, seier han.
Bøndene ventar at også politikarane vil høyre på bøndene.
– Eg reknar med politikarane er der og høyrer kva vi seier. Det ventar eg. Så får vi vist det norske folk at vi ynskjer å halde fram som bønder i Norge, seier Haugland.
- Les også: Vil protestere for å unngå utvidelse
– Eigentleg nøgde
Bøndene meiner at det økonomiske tilbodet frå staten reelt sett er dårlegare enn andre yrkesgrupper.
I tillegg meiner bøndene at tilbodet vil favorisere dei store bøndene, og fryktar at mange småbruk må kaste inn årene.
– Norske bønder er eigentleg veldig nøgde. Men vi har ei tydeleg meining om kva retning vi skal gå i. Vi har lyst til å produsere meir klimasmart og berekraftig mat på lokale ressursar, og ikkje ha ein landbruksproduksjon som er basert på importerte råvarer, seier Birte Usland i Vest-Agder Bondelag.
