Byter ut helseskadleg orgel

– Det kom til eit punkt der eg ikkje kunne spele meir enn 20 minutt før eg miste kjensla i skuldrer og fingrar. Det var fysioterapeuten min som fann ut av dette, seier kantor Andrew Wilder til NRK.no.

I 12 år spelte han på eit orgel som har ført til nerveskadar, operasjon i begge handledd og to nye skiver i nakken. Etter mangfaldige utgreiingar og sjukmeldingar avgjorde kyrkjesjefen at orgelet var helseskadeleg.

Stengde orgelet

No spelar han på eit mellombels digitalt orgel, men neste år får han Norges første helse, miljø og sikkerheitsorgel.

– Med det same vi gjekk inn for å stengje orgelet hadde vi ei HMS-sak. Vi hadde arbeidsutstyr i kyrkja som ikkje lenger kunne brukast. Det utløyste eit behov som vart nemnt til kommunen. Vi må sjølvsagt ha eit skikkeleg orgel i domkyrkja, seier han.

• LES: Unge under 25 år skader seg mest på jobb

Kantor Bjørn G. Odden har eit elsk-hat-forhold til arbeidsreiskapet frå 1960-talet. I fjor vart det påvist i fleire rapportar at også dette orgelet fører til yrkesskadar.

– Det er ikkje veldig motiverande. Det har blitt meir og meir at dette er noko eg må gjere. Alle må jo ha eit levebrød. Tanken har slått meg mange gonger at det hadde vore godt å ha noko anna å gjere, seier han.

Arbeidspress

Nestleiar i Musikernes Fagorganisasjon og orgelkonsulent, Anders Hovind, seier det er mange døme på orgel som fører til belastingsskadar.

– Det er gjerne ein kombinasjon av arbeidspress. Altså at ein har behov for å øve mykje, kombinert med dårleg ergonomi og instrument som er tunge å spele, seier han til NRK.no.

– Orgel er jo veldig store instrument og ofte når ein skal kople saman fleire manualar blir instrumenta tungspelte, seier han.

Det nye orgelet i Domkyrkja i Kristiansand kostar 12 millionar kroner. Det er utforma for å unngå belastingsskadar, men er utforma slik at det er ein tru kopi av originalteikningane til det opphavlege orgelet i kyrkja.

Men i Vågsbygd kirke må Bjørn G. Odden framleis vente på eit nytt orgel.

– Ofte når eg spelar i gudstenestene føler eg meg som ein gutunge, som har det veldig gøy. Eg tykkjer det er moro og det gir meg ein god del, men er ei hake med dette orgelet, seier han.