Fredag gav 296 av dei totalt 500 representantane i det thailandske underhuset Yingluck tommelen opp. 44-åringen har dermed fått nok stemmer i parlamentet til å innta toppjobben.
Etter valsigeren i byrjinga av juli, har partiet til Yingluck, Puea Thai saman med sine koalisjonspartnarar, lagt beslag på rundt 60 prosent av setene i parlamentet.
Det var dermed venta at Shinawatra ville få den naudsynte støtten til å ta på seg leiar-vervet.
Første kvinne
44-åringen blir landets 28. statsminister og den aller første kvinnelege statsministeren i Thailand. Ho vil bli teken i eid i løpet av kort tid.
I valkampanjen hausta Yingluck stemmer med sine lovnader om auka minsteløn og høgare risprisar for bøndene. Men mange er også skeptiske til den påtroppande statsministeren.
Yingluck er nemleg systera til tidlegare statsminister Thaksin Shinawatra, som ble avsett av militæret i 2006 etter skuldingar om korrupsjon.
Forretningskvinna Yingluck vert skildra som ein nykommar i politikken, og mange fryktar at det i realiteten er storebroren som trekk i trådane. Han har tidlegare kalla henne ein klon av seg sjølv.
Ein tilhengar av Yingluck Shinawatra feirar utanfor parlamentet i Bangkok fredag.
Foto: Sakchai Lalit / ApTøff start
I kjølvatnet av kuppet har Thailand vore prega av sterk politisk uro. Ein av dei største umiddelbare utfordringane som Shinawatra må ta fatt på, blir å finna ei fredeleg løysing på konflikten.
– Ho inntek vervet midt oppi ein stor konflikt i eit land der det rår svært ulike oppfatningar om kven som skal styra og korleis, seier den politiske analytikaren Chris Baker til nyheitsbyrået AFP.
Avtroppande statsminister Abhisit Vejjajiva tala til nasjonen for siste gong i vervet torsdag kveld. Han forsvarte sine økonomiske prestasjonar og uttrykte håp om at den nye regjeringa ville greia å få ein slutt på den djupe politiske konflikten i landet.
