Eksplosjonen førte til at fleire gassylindrar også gjekk av, og øydela fleire hus og bilar i nærleiken. Minst 25 menneske vart drepne, og 154 vart skadde, opplyser politiet til nyheitsbyrået AFP.
– Vi fryktar at dødstala vil gå opp fordi tilstanden til fleire av dei skadde er veldig kritisk, seier politisjefen Aftab Cheema.
Starta av bilbombe
Han opplyser at eksplosjonen var starta av ei bilbombe inne på ein CNG-stasjon (compressed natural gas). Mange bilar i Pakistan går på slik CNG-gass.
Augevitnet Ijaz Hussain fortel at det var ein kraftig smell.
– Det var øyredøyvande. Eg trudde bakken hadde gitt etter på grunn av eit jordskjelv. Alle sprang hit og dit for å redde livet, fortel han og seier han såg skadde og omkomne liggande på bakken etterpå.
TV-bilete viste at gasstasjonen vart redusert til ein haug av murstein og samankrølla metall etter eksplosjonen.
Auke i bombeangrep
Dei siste tre åra har det vore ein auke i bombeangrep i Pakistan, nær den nordvestlege grensa til Afghanistan. Dette er eit område der militære styrkar utkjempar kampar mot Taliban.
Hæren seier dei mange militære angrepa mot området har har svekka dei militante gruppene, men at slike bombeangrep framleis skjer.
