Dette skal ha skjedd like etter at ei gruppe soldatar tok seg inn i eit FN-kontor like ved, og tok med seg den tidlegare sjefen for marinen i landet, Bubo Na Tchuto. Han søkte tilflukt i FN-bygningen etter at han vart mistenkt for å ha leidd eit mislukka militærkupp i 2008.
Den nasjonale radioen har avbrote sendingane sine og spelar no berre militærmusikk. Dette tyder på at det er gjennomført eit militærkupp i landet.
Det portugisiske nyheitsbyrået Lusa melder at store kontingentar med soldatar no fyller gatene i hovudstaden Bissau.
Ein medarbeidar av statsministeren seier at statsministeren no er sett fri, og at han har vore i samtalar med presidenten. Han vart etterpå eskortert tilbake til statsminister-residensen.
Guinea-Bissau har ei historie full av militærkupp og politiske drap sidan landet vart sjølvstendig i 1974. I 1998 vart fleire tusen menneske drepne i borgarkrigen som rasa i landet.
Hæren tok makta i landet i 2003. I 2005 blir Joao Bernardo Vieira, som tidlegare har teke makta i eit kupp, valt til president. Han vart drepen i 2009, og sidan har det vore fleire politiske drap i det fattige landet.
NRK.no kjem tilbake med meir.
LES OGSÅ:
LES OGSÅ: