Har gitt opp kampen for Vassenden

Kraftig nedgang i elevtalen og mindre inntekter, gjer at fylkeskommunen ser på strukturen i den vidaregåande skulen.

Mellom tre og sju av dagens 13 skular står i fare for å bli lagde ned. For Mo og Jølster si avdeling på Vassenden har vore trua fleire gonger. No ser det ut til å vere slutt.

• LES OGSÅ: Lysande kamp for skulen i Jølster

– Vi har hatt mange rundar på dette. Men det har ikkje vore lett å finne støtte hos fylkespolitikarar eller andre for å behalde denne avdelinga, seier ordførar Oddmund Klakegg (Sp) i Jølster til Firda.

Flytta til Førde

Saman med ordførarane i Gaular, Førde, Naustdal og Florø har han no signert eit innspel der dei aksepterer at tilboda design og handverk, medium og kommunikasjon og studiespesialiserande formgjevingsfag blir flytta samla til ein annan vidaregåande skule i Sunnfjord. I praksis til Førde.

• LES OGSÅ: Fryktar stort område kan bli ståande utan ein einaste vidareåande skule
  
• LES OGSÅ: Fylkesdirektør vil kutte klassar ved skulane allereie til hausten

Klakegg seier til avisa at det er eit absolutt krav at også andre regionar reduserer.

– Det er heilt uaktuelt å flytte desse tilboda ut av regionen, ettersom dette er med på skape ein ubalanse mellom elevplassane, sett i eit fylkesperspektiv, heiter det i uttalen.

Aksept på skulen

Ordføraren i Jølster er imponert over dei tilsette ved skulen, som har akseptert at det no går mot nedlegging – og flytting til ein annan skule.

• LES OGSÅ: Vil ikkje meine noko om skule enno
  
• LES OGSÅ: Fryktar hybelbuar-rapport blir argument for skulenedlegging

(Artikkelen held fram under biletet).

– Vi er innstilte på å flytte til Førde som eit samla fagmiljø, seier tillitsvald i Undervisningsforbundet, Ole Johnny Devik til Firda.

– Med gangavstand til kunstmuseet, mediebedriftene og lærebedriftene, kan flyttinga kanskje bli på grensa til å vere positiv, held han fram.