– Eg trur eg er den einaste i vennekretsen som er «koronafast». Det kjennest som om alle andre har gått vidare, fortel Oliver Bruland heime frå sofaen.
I fjor fekk han førstegongstenesta utsett eit år for å studere spansk i Costa Rica i Mellom-Amerika.
Alt i februar hadde han lagt planar for året. Han leverte oppseiing frå ekstrahjelp-jobben på det lokale bakeriet og gjorde seg klar for å flytte.
Planane gjekk i vasken
Så stenge verda ned. Brått vart Oliver ein av dei mange som ikkje kom seg av garde. Og det vert heller tre år med fri dersom han held på planane han hadde for eit år sida.
– Eg er bekymra for dei ungdommane som ikkje får flytte på seg og begynt det livet dei ønsker å begynne på, seier psykolog Maria Abrahamsen Østhassel.
Psykologen står bak den populære kontoen @psyktdeg på TikTok, Instagram og Facebook. Der vert ho ofte kontakta av unge som fortel at dei er einsame.
Ein kritisk fase i livet
– Ungdom i denne situasjonen er i ein ekstra kritisk fase i livet. Dei er under utvikling og er derfor ei risikogruppe i seg sjølv når det kjem til den psykiske helsa, seier Østhassel.
Mange av kompisane til Oliver har reist på folkehøgskule og universitet.
– Det er litt surt å sjå og høyre om alt det gøye dei gjer på. Mens eg ikkje har gjort noko anna enn å jobbe, seier han.
– Økonomisk sett har eg eit veldig bra år. Eg tener pengar og sparar opp. Men så er det ikkje så mykje å gjere på heller.
Heldigvis fekk han tilbake jobben på Naustdal Dampbakeri, og sidan i haust har han stått opp grytidleg for å halde butikkane i Sunnfjord med brød.
Mange kjenner seg einsame
For mange var 2020 året dei skulle feire avslutninga på mange år med grunnleggande skulegang. Tida var endeleg inne for å reise ut i verda og gjere sjølvstendige val for framtida.
I staden måtte russekullet feire avslutninga på mange års skulegang med ein meter avstand. Festivalsommaren vart avlyst, og sydenferien fråråda og skambelagt.
– Eit år for ein ungdom er mykje lengre enn for ein trettiåring, seier Østhassel.
– Ikkje berre ser vi at sosial isolasjon kan føre til angst, depresjon og einsemd, men også fordi vi skal utvikle vår sosiale kompetanse i møte med andre, seier ho.
Sjølv om det er kjipt, er Oliver bestemt på å bite tennene saman og gjere det beste ut av situasjonen.
– Eg er ikkje den einaste i Noreg som har det sånn, seier Oliver Bruland.