– Det fyrste eg gjorde var å ta bilete av det. Eg har aldri sett det før, seier student Tuda Oussous.
Som fyrste universitet i Noreg har Universitetet i Bergen (UiB) no starta eit prøveprosjekt med gratis tampongar, truseinnlegg og bind på toaletta på campus.
– Eg synest det er skikkeleg, skikkeleg kult. Plutseleg får ein mensen under ei førelesing. Å då vita at ein kan springa rett ned her, henta seg ein tampong og vera trygg, er fantastisk, seier Andrea Nesvik Voss, nestleiar i Studentparlamentet ved UiB.
Denne dispenseren inneheld bind, tampongar og truseinnlegg. Enn så lenge finst dei berre i ein storleik på produkta.
Foto: Linnea Skare Oskarsen / NRKFørebels er det plassert ut dispenserar på Studentsenteret, Odontologibygget og Jussbygget.
Dersom prosjektet fungerer godt, vil universitetet vurdera å utvida prosjektet.
– Eg håper ordninga blir større og tilgjengeleg på heile campus, seier Nesvik Voss.
For akutte situasjonar
Prorektor Pinar Heggernes, ved UiB ønsker prosjektet velkommen.
– Eg er heilt einig med studentane i at dette burde vore eit gratistilbod for alle kvinner. Viss vi kan gjera kvardagen litt lettare i alle fall for studentane på campusen vår, blir eg veldig glad for det.
Prorektor ved UiB Pinar Heggernes, ønsker gratis bind og tampongar velkommen på campus.
Foto: Linnea Skare Oskarsen / NRKKor mykje prosjektet vil kosta er avhengig av kor populært tilbodet blir.
Dette vil universitetet sjå på i løpet av hausten.
Ho legg til at tilbodet fyrst og fremst er for akutte situasjonar.
– Ein skal komma seg forbi krisa, og komma seg til butikken eller hybelen sin for å skaffa seg resten.
Forventar at regjering tek tak
Ei anna som er glad for nyheita er Helle Sofie Sagøy.
Ho har kjempa for at Universitetet i Agder skal tilby gratis bind og tampongar.
– Eg håper Universitetet i Agder kan gå i fotspora til UiB, seier ho.
Også leiar Maika Maria Godal Dam i Norsk studentorganisasjon er glad for at universitetet tek eit ansvar.
Ho håper meir blir gjort på myndigheitsnivå for å sikra tilgang til mensprodukt.
– Eg forventar at helseministeren og resten av regjeringa tek eit ansvar for at vi ser slike initiativ på andre lærestader.
Leiar i NSO ønsker at regjeringa tek ansvar for at fleire universitet tilbyr mensprodukt.
Foto: ISMAIL BURAK AKKAN / NRKHelseminister Ingvild Kjerkol (Ap) seier at det ikkje er laga planar om å innføra gratis bind og tampongar i Noreg.
Nesvik Voss i Bergen har likevel tru på at fleire vil følgja etter.
– Vi har mykje kontakt med andre studentpolitikarar, og dei var gira på å få meir informasjon slik at dei kunne sjå på dette sjølv.