Fem mil utanfor Florø ligg oljefeltet Gjøa.
Då olje- og gasselskapet Neptune Energy søkte om bygge ut eit nytt produksjonsområde på feltet i 2019, handla Oljedirektoratet raskt.
Knappe to år etter at søknaden vart sendt, var produksjonen på det nye området alt i gang.
Kvifor kan ikkje Noregs vassdrag- og energidirektorat (NVE) handle like raskt, lurer ordførar i Kinn kommune, Ola Teigen (Ap).
Konsesjonssøknadar knytt til utbygging av straumnettet tar nemleg dobbelt så lang tid å behandle.
– Sett opp mot det grøne skiftet, er dette eit stort paradoks, seier Teigen.
– Det er kø i innboksen
Illustrerande for florøværingane er at krafta frå «det hata» vindkraftverket på Guleslettene, som ikkje kjem Florø-industrien til gode fordi kapasiteten på straumnettet er for låg.
Kinn-ordføraren vil ha nye kraftkablar til industrien i dag – ikkje vente i fire år på «sinken NVE».
– Vi når sannsynlegvis ikkje målsetninga, fordi saksbehandlinga tar for lang tid.
Fylkesordførar i Vestland, Jon Askeland (Sp) seier det same.
– Konsesjonssøknadane blir liggande altfor lenge på bordet til NVE, seier han.
To konkrete eksempel er søknadane til industriområda på Kollsnes og Mongstad, som enno ikkje har fått saksbehandlar.
– NVE er ein flaskehals
For Vestland fylkeskommune er tida knapp, då dei siktar seg inn på å vere utsleppsfrie innan 2030.
Den største utfordringa til omstillinga er å få nok kraft til kystområda i fylket, slik at ny industri kan vekse fram.
– Saksbehandlingstida i NVE er eit stort problem for oss. Vi produserer krafta, men får ho ikkje ut til kysten. At det ikkje er kraft her, er ei grov unnlatingssynd, seier Askeland.
Vestland fylkeskommune og ni kommunar står bak organisasjonen Invest in Bergen. I eit notat skriv dei at NVE er «ein flaskehals».
For å møte det kommande behovet for elektrifisering av samfunnet, oppnemnde Solberg-regjeringa i år eit offentleg utval som skal vurdere utviklinga av straumnettet.
– Ei viktig oppgåve for utvalet blir å vurdere tiltak som kan redusere tida det tar å handsame søknadar, sa Tina Bru (H) i juli.
Strømnettutvalet skal levere si innstilling innan 15. juni 2022.
NVE lovar betring
Avdelingsdirektør i NVE, Inga Nordberg vil ikkje kommentere enkeltsaker, men fortel om ein stor auke i konsesjonssøknadar.
– Det har dessverre oppstått kø hos oss. Vi ønskjer naturlegvis ikkje å vere ein sinke, seier ho.
I dag ligg det om lag 70 saker på bordet til NVE, som alle ventar på saksbehandlar.
I statsbudsjettet for komande år får NVE midlar til å auke kapasiteten, i alt 15 nye stillingar. Nokre av desse skal handsame søknadar knytt til havvind, men auka kapasitet skal også kome andre konsesjonar til gode.
Det blir også gjort endringar internt slik at saksbehandlinga får fortgang, seier Nordberg.
Samtidig som ho har forståing for frustrasjonen, peikar ho på behovet for å ha grundige, demokratiske prosessar i samband med nettutbygging.
I haust konkluderte Høgsterett med at vindkraftanlegget på Fosen i Trøndelag var bygga i strid med urfolksrettar.
– Det er omsyn til natur, produksjon, kulturminne, reindrift, alt dette skal belysast så godt som mogleg. Derfor er det viktig at det er grundige prosessar, slik at ein gjer gode vedtak, seier Nordberg.