Sommarsol og sommarregn på SommarLutt

Sjå alle framføringane under SommarLutt nedst i saka

Like før opninga av festivalområdet til årets Malakoff Rockfestival, varma festivalpublikummet opp med NRK SommarLutt, i Nordfjordeid sentrum. Seks artistar frå Sogn og Fjordane fekk underhalde eit smilande publikum som har venta lenge på festivalstemninga.

Litt over halvvegs i konserten kom det ei torebyge med tropisk sommarregn, og mange såg seg nøydde til å flykte til tørr tryggleik. Men ein publikumsfriar sørga for at folk vågde seg tilbake til scena for dansestemning då byga var forbi.

• Les også: Stolt festivalgeneral etter «tidenes Malakoff»
• Les også: Malakoff-festen over for i år

Festivaloppvekst

Framfor scena var området fullt av folk i alle aldrar. Ole Martin Engjaberg og niesa Maja er begge eidarar med rik festivalerfaring.

– Eg har mange gode minner frå Malakoff, eg har vore med på alle festivalåra, unntatt eitt år. Eg passar alltid på å få ferien til å klaffe slik at eg kan vere her, seier onkel Ole Martin.

Maja har sjølv vore med på festival i tre-fire år og fekk med seg SommarLutt-konserten frå skuldrene til onkelen.

– Sånn er det å vokse opp på Nordfjordeid, det er tidleg rekruttering, seier Ole Martin Engjaberg.

• Les også: Sydenstemning på Malakoff
• Les også: Denne gjengen dikta seg til Malakoff

Liverpoolgjengen

Eline Brun frå Jostedalen spelte på SommarLutt-scena i lag med I See Rivers. Gruppa vart starta i Liverpool, på LIPA-skulen som blir fronta av Paul McCartney.

– Det var kjempekjekt å spele her. Malakoff er ein sommartradisjon for meg, så det var veldig kjekt å spele her, seier Eline.

Bandet frå Liverpool har gått i same klasse som eidaren Aleksander Raftevoll, som fekk helse på publikummet frå SommarLutt-scena. Han skal spele på Malakoff si amfiscene i helga.

– Eg trefte faktisk Eline for første gang her på Malakoff, sommaren før vi byrja i Liverpool. Og sidan har vi vore bestevennar, seier han og ler.

Garanterte dansestemning

Då torebyga skylla inn over Nordfjordeid, var det mange som flykta frå sceneområdet. Indigo Child og Tina Refsnes gjennomførte trass i regnet som plaska inn på scena, og demonstrerte tapper «show must go on»-moral.

Like før årets vinnar av SommarLutt-prisen, Kjartan Lauritzen gjekk på scena, stoppa regnet og publikum byrja på nytt å dukke opp framfor scena.

– Vi lagar dansestemning uansett om det er ti eller ti tusen her, sa artisten Kjartan Lauritzen medan det på nytt byrja å fylle seg opp framfor scena.

Og dansestemning vart det.

• Les også: Kjartan Lauritzen vann SommarLutt-prisen
• Les også: Stod opp midt på natta for å sikre seg teltplass

Sjå alle dei 6 bidraga og heile konserten frå SommarLutt-prisen her

Sjå heile konserten her