Mange ungdomar vel laussnøen - men ikkje alle gjer det trygt

Opedal er ein av kursdeltakarane på Fjellsportfestivalen sitt skredkurs spesielt retta mot ungdom og dei som ikkje kan so mykje om skred og skredfare.

– Eg ferdast ein del på fjellet, men manglar kunnskap om når det er skredfarleg, om kvar eg kan gå for å vera sikker på at det ikkje går skred og slike ting, seier Opedal.

• LES OGSÅ: No har snøskreda byrja å kome

31-åringen frå Haugesund er ein ivrig topptrakkar, men han kan ikkje veldig mykje om skred. Slik trur han situasjonen er hjå litt for mange.

– Eg trur det er mange som ikkje veit so mykje so dei burde vite før dei legg ut på tur. Det må nok absolutt gjerast ein innsats for at folk skal få nok kunnskap.

• SJEKK VÊRVARSELET HER
• LOKALT SKREDVARSEL FOR SOGNDAL
  

– Tenkjer ikkje på farane

Skikøyring i laussnø er blitt den nye folkesporten for dei skiglade, og fleire og fleire leitar etter den uberørte pudderaktige snøen i bratte fjellsider. Skitrekka har gjort nye område lettare tilgjengeleg for frikøyring.

Men turen i dei bratte fjellsidene kan gå frå himmel til helvete på få sekund.

(Artikkelen held fram under biletet)

• LES OGSÅ: Varslar lokalt stor snøskredfare

Vinteren 2010/2011 var den verste skredvinteren sidan 1986, med 13 omkomne.

– Det er mange ungdom som er på tur utanfor løypene, og det er kanskje ikkje alle som er like bevisste på farane i terrenget, seier Per Magne Bakke.

Bakke er ein av to kurshaldarar som held skredkurs for nybyrjarar på Fjellsportfestivalen i Sogndal, spesielt mynda på ungdom.

• LES OGSÅ: Ber folk styre unna farlege områder

Betre føre var

– Kunnskapsnivået til ungdom som driv med toppturar og laussnøkøyring er ganske varierande, og det kan bli farlege situasjonar når dei ikkje veit kva dei driv med, seier den andre kurshaldaren, Marit Svarstad Andresen.

På todagarskurset i Hodlekve får deltakarane prøvd seg på litt søking med skredsøkar, men det blir mest førebyggjande arbeid.

– Fokuset er å sjå på snøforholda og å kjenna att skredfarleg terreng for å unngå å bli tatt av skred, seier Svarstad Andresen.

• LES OGSÅ: Her sjekkar du skredfaren på nett

– Ekkelt

– Det er litt ekkelt å vera på tur utan å vita so mykje om skredfaren og slike ting. Ein føler seg ikkje alltid like trygg på topptur når ein ikkje har den kunnskapen ein treng, seier Cecilie Ness

Ho og venninna Anne Sigrid Hundere, er dei to einaste jentene blant dagens elleve kursdeltakarar.

(Artikkelen held fram under biletet)

– Det blir ein del toppturar, so no er det på tide å læra meir om skredfare, korleis vurdera om det er trygt å gå der og kva ein skal sjå etter i naturen for å avsløra om den kan rasa ut, seier Ness.

Ho trur ikkje ho er åleine om å kunna for lite om temaet før ein legg ut på tur.

– Det er nok fleire enn meg som ikkje kan so mykje, sjølv om det er mange av dei som kan litt også.