Noregs beste narkohund forsvann – kan bli sett ut av spel i lang tid

Det har vore eit nervepirrande døgn for eigar og hundeførar Øyvind Førde.

– Eg fekk frysningar nedover ryggen. Då eg fekk beskjed om at redningsmannskapet såg ein hund som halta, gjekk det opp for meg at han var i live, seier Førde.

Politihunden Odin forsvann like før klokka 13 måndag på veg til Hatlesetnipa i Eikefjorden mellom Førde og Florø.

Nær eit døgn seinare vart hunden funnen.

– Han var skadd, ikkje gangbar, så vi har fått trekt han ut med helikopter, fortel Daniel Stenvig i politiet til NRK.

Han fortel at det også var helikopteret som fann han.

– Vi må rette ein stor takk til dei for at dei tok seg tid til å bli med på leitinga. No får vi håpe at vi får Odin opp på beina igjen.

– Det er litt ekkelt

Etter ein omfattande redningsaksjon vart Odin flogen til veterinæren i Florø.

Svara frå røntgenbilda var ikkje det Øyvind Førde hadde håpa på.

– Det er mogleg brot i høgre olboge. Det er litt vanskeleg å sjå, så vi må til ortoped i Bergen, fortel eigaren.

Eit brot kan gjere at narkohunden er ute av spel i tre månader. Usikkerheita tærer på.

– Det er alltid litt ekkelt. Ein må tenke litt på dyrevelferda og kva sjansar det er for at han kan leve vidare utan smerter.

I mellomtida går Odin på smertestillande og det er framleis vanskeleg å seie kor omfattande skadane er.

Forsvann tidleg

Det var under ein privat tur politihunden Odin forsvann måndag.

– Me hadde gått 20 minutt. Odin er snart 10 år gamal, og han har ein ryggsjukdom som gjer at han ikkje spring så mykje i terrenget. Han går mykje bak meg på tur. Det hadde gått 3–4 minutt utan at eg såg han. Då gjekk eg tilbake, men han var vekke, seier hundeførar Øyvind Førde.

Leita til midnatt

Førde, tre andre frå politiet og ein politihund leita etter Odin fram til midnatt i går, utan resultat. Førde sov også i telt ved parkeringsplassen, i tilfelle hunden skulle koma ned att.

– Eg veit ikkje kva som kan ha skjedd. Han har ikkje noko særleg vilt-interesse. Men han er jo eit dyr, så kan ha sprunge etter noko, sklidd og blitt liggande ein stad. Men det blir berre spekulasjonar, sa Førde.

Det var i alt 17 personar frå politiet med på leiteaksjonen. Nokre var der på jobb, andre brukar fritida si på å leita.

– Han er ein viktig ressurs for oss, seier Førde.

Hundar og helikopter leitar også

Fleire hundar frå Norske Redningshundar var på veg, på eige initiativ. Oda Elvegård Thorstad jobbar i politiet, og har ein hund under utdanning til å bli redningshund.

Ho var sjølv med på søket etter Odin.

– Det er relativt bratt terreng, som er eit utfordring i seg sjølv. I tillegg er det første gong me leitar etter ein hund, seier Thorstad.

Eit redningshelikopter gjer også eit søk etter hunden. Helikopteret i Florø hadde ein planlagt treningstur i same område i dag, og brukte den til å hjelpa til i søket.

– Helikopteret har varmekamera om bord, og dei tek eit sveip over området for å sjå om dei ser noko, sa Edvard Middelthon, redningsleiar ved Hovudredningssentralen i Sør-Noreg.

NM-vinnar

Odin var ferdig utdanna i 2018. Same året gjekk han til topps i NM .

Hunden var ikkje i band då han forsvann.

– Kvifor var ikkje hunden i band?

– Det er bandtvang. Politiet har eit unntak i samband med trening. Her har han gått bak meg på tur, og så har han forsvunne. Men denne turen var ikkje lagt opp som hundetrening, seier Førde.

– Kjem du til å ha hunden i band neste gang du er Hatlesetnipa?

– Ja, det kjem eg til å ha, seier hundeføraren med eit smil.