Feira nytt passkontor i sommar – no vil regjeringa fjerna det igjen

Jubelen stod i taket då det mot slutten av 2023 vart kjent at 14 stader i Noreg skulle få passkontoret sitt tilbake.

– No er det andre bollar, uttala tidlegare justisminister Emilie Enger Mehl (Sp) til avisa Grenda så seint som i august i år.

Då hadde Senterpartiet partiet invitert til ein aldri så liten markering på tettstaden Husnes.

Det var ein av stadene som hadde fått passkontoret sitt tilbake.

Solberg-regjeringa reduserte nemleg talet på passkontor i Noreg tilbake til 2018.

I staden vart dette erstatta med ein omreisande passbuss.

Ein buss i Nord-Noreg og ein i Sør-Noreg.

– Eg synest ikkje det er riktig at tenester skal komma køyrande når det passar for staten, sa Mehl til NRK då gjenopninga vart kjent mot slutten av 2023.

Bygde om

På politistasjonen i vestlandskommunen Kvinnherad, som har 13.000 innbyggjarar, er politistasjonssjef Sigurd Børve glad for å kunne gje tilbodet tilbake til befolkninga.

Etter ombygging, til om lag éin million kronar i fjor, kunne dei ynskja velkommen for passbestilling igjen.

– Tilbakemeldingane er positive, sa han då.

Sidan 2019 måtte innbyggjarane i kommunen anten ta ferje til nabokommunen Stord eller køyra til Odda om dei skulle ha pass.

Eller, dei kunne venta til passbussen kom innom på turne i Sør-Noreg.

– Passbussen er sikkert eit godt tilbod, men me får bestilt om lag 2.000 pass og ID-kort i året, og då dekkjer berre den ein mikroskopisk del av behovet, seier han.

Men no kan både ombygging vera bortkasta, og den kostbare maskinen kan bli sendt tilbake.

For i forslaget til statsbudsjett vil regjeringa leggja ned 14 passkontor.

Erstatninga er passbuss. Igjen.

– Det gjer det i alle fall krevjande for oss som skal drifta denne eininga, seier Børve, men legg til at den største utfordringa kjem for innbyggjarane som no kan stå ut passtilbod igjen.

Departementet: – Kontora er lite besøkt

Justis- og beredskapsdepartementet viser til politifaglege råd. Og at dei nyleg opna kontora har vore lite besøkt med få søknadar.

– Arbeidarpartiregjeringa er oppteken av at politiet sine ressursar vert brukt på ein effektiv måte, samstundes som innbyggjarane får eit best mogleg tilbod. Dei 14 nye passkontora er lite besøkt og har få søknadar, skriv statssekretær Joakim Øren (Ap) i ein e-post.

Ein oversikt som NRK har fått over tal på søknadar om pass og ID-kort viser at kontoret på Flisa hadde 339 søknader i april i år.

På Husnes hadde dei 190 i same månad.

Kontoret i Skibotn/Lyngen hadde 58 søknader i april, medan berre 13 søkte om pass eller ID-kort i mai.

På Røros var det 372 som søkte om pass eller ID-kort i juni. Oversikta seier ikkje noko om kor mange dagar kontora har vore opne.

Departementet understrekar at ingen kontor skal verta lagt ned før tilsvarande eller betre tilbod gjennom passbussar er på plass.

Det er ei forklaring som dei på Husnes ikkje kjøper:

MDG gir støtte til regjeringa

Forslaget får ikkje uventa reaksjonar frå mellom anna Erling Sande i Senterpartiet.

– Me er veldig skuffa over dette. Dette betyr at folk i desse områda får eit dårlegare tilbod, seier han.

Han legg til at Senterpartiet og Arbeidarpartiet stod saman mot ein sentraliseringspolitikk.

– Det vert ekstra ille når det er investert i nytt utstyr og lokale er bygd om, seier han.

Andre politikarar er derimot nøgd med regjeringa sitt forslag.

– Eg vil rosa regjeringa for å lytta til faglege anbefalingar frå politiet, og gå inn for mindre av den detaljstyringa av lokalisering som Sp stod for. Det er bra at Ap reverserer opprettinga av passkontor som har ført til unødig tids- og ressursbruk, og bytar ut dette med passbuss som vil gje eit samla betre tilbod til innbyggjarane, seier Julie Stuestøl (MDG), medlem av justiskomiteen, til Politiforum.